#عفريت_البيريود (الدورة الشهرية يعني)
أنا عارف إن كل بنت هتقرا العنوان ده هتفهم أنا عاوز أقول ايه من غير ولا كلمة, ومتأكد برضو ان كل راجل هيقرا العنوان ده هيحصله اشمئناط موضعي
المهم
الجزء العلمي هقوله سريعا ان فيه نوعين من الألم للدورة الشهرية إما يكون احتقاني او تقلصي .. الاحتقاني Congestive بيكون قبل نزول الطمث بأيام قليلة بسبب احتقان الرحم بالدم واحتقان الجسم بالسوائل وبينتهي مع نزول الدم ,, النوع التاني التقلصي Spasmodic بيكون أثناء نزول الدم بسبب تقلص عضلات الرحم وبينتهي مع انتهاء الانقباضات العنيفة .
فيه نساء بيعانوا من نوع واحد وللأسف فيه نساء بيعانوا من النوعين وبيختلفوا في الشدة طبعا
كل ده معروف .. اللي يخصنا بقى الجزء النفسي(( وما أدراك ما الجزء النفسي ))
كلنا دايما بنحس ان الستات متقلبات المزاج ( الدعابات والسخافات والنكت) كلها بتتهم الستات بتقلب المزاج .. لكن بحسبة بسيطة هتلاقى ان معظم التقلب المزاجي راجع للدورة الشهرية .. هتفضل الست لطيفة وطيبة طول الشهر ,وعند نقطة محددة بتتحول … كل زوج عارف انها بتتحول بس مش كتير بيربطوها بالدورة الشهرية .. ركز معايا .. كل زوج يمسك ورقة وقلم ويحسب لزوجته يوم بيوم .. هيلاقيها فى الأغلب لطيفة طول الوقت وعند يوم محدد هتلاقى العفريت ظهر .. أيوة عفريت رسمي فهمي نظمي .. هية مش هية .. خالص ..مش طباعها ولا سماتها خالص ,, العفريت ده بقى لذيذ جدا . وبياخد في الأغلب 3 أشكال ..
((الأول)) .. العصبية الشديدة والحساسية من أي كلمة. .هنا بيظهر ضرب العيال بالشبشب الشهير اللي دايما بيصيب الهدف للأسف ..
العفريت ((الثاني )).. الكآبة والاكتئاب والبوز الجامد .. مش طايقاك ولا طايقة العيال ولا طايقة البيت ومش عايزة تتفسح رغم انها بقالها سنة بتتحايل عليك تأكّلها ترمس وحلبسّة ودرة ع النيل .. مفيش بقى خلاص .. كله بيقفل والكهارب بتطفي تماما
العفريت ((التالت)) ده بقى بتاع الأفلام العربي .عفريت البارانويا . تشك فيك وتشك فى كلامك ورحت فين وجيت منين وانت بتخوني وبتاع ( ده لا يمنع انك تكون فعلا بتخونها فعلا طول الشهر .. عادي مش كله توتر طمث يعني .. متتحججش )
ال3 عفاريت دول في رأيي همة سر لخبطة أسرية ضخمة جدا بتحصل بين المخطوبين والأزواج .. وزيجات كتير بتتهد للأسف لأنهم مش عارفين ان فيه عفريت بيزورهم كل شهر . الخناقات بتتكرر والخلافات بتزيد والقلوب بتقسى
الست نفسها مبتبقاش مركزة وفاهمة ان سر الخناقات الشهرية هو الدورة الشهرية نفسها ( طبعا اكيد مش ده السبب الوحيد للخلافات بس دى ظاهرة مهمة )
الحل ايه بقى !!!
الحل ان كل اتنين يركزوا جدا ويحسبوا لتوقيت قدوم العفريت
. ولازم الكل يعرف ان السلوك القادم مش مسئولية الست ..ده مسئولية العفاريت التلاتة .. نكتب سوا ايه اللى بيحصل .. نعرف نوع العفريت ونتعلم طريقة احتواءه .. هنا بيكون الزوج مسئول انه يعرف احتياجات زوجته في اللحظة دي !! هل هى محتاجة مزيد من الحضن والطبطبة ولا التجنب والتطنيش ولا ان الأسرة كلها تاخد الموضوع بشكل كوميدي
كل اللى انا عايز اوصله إن الستات معذورة ..الموضوع مش بس ألم عضوى .. الموضوع اكبر من كدة .. من أحد التفسيرات للألم الاحتقانى ان السوائل بتزيد وبتضغط على خلايا المخ وبتسبب ألم نفسي فوق الألم العضوي وده ممكن يكون محتاج تدخل طبي دوائي لتقليل سوائل الجسم
المهم : مطلوب جدا من الطرفين انهم ميضيعوش علاقتهم بسبب شىء عارض ويتخيلوا بالغلط انه جزء من شخصياتهم
بتاتا ,
ده عفريت بييجى ويروح كل شهر 3 ايام .. نكبّر يعنى ونكمل حياتنا
خسارة نخسر أكتر من اللى بنخسره بسبب أسباب مختلفة
وتحياتي للنساء الأشد تألما والأكثر صبرا
#زغنديات
https://www.facebook.com/hani.mostafa.1257/posts/712696842208498