علاقة العكسية ما بين احلامه و ما بين تقدمه فى السن

من أرخم المراحل اللى أى واحد بيمر بيها انه يوصل لفهم وحقيقة العلاقة العكسية ما بين احلامه و ما بين تقدمه فى السن و زيادة علمه وتجاربه فى الحياة.

طول ما أنت جاهل بالوضع اللى قدامك بتحلم وتحط أهداف كبيرة جداً، فالطفل مثلاً بيحلم انه بيطير ومش بعيد يجرب يطير كذا مرة لحد ما يعرف ان الكلام ده صعب، بيكبر شوية يحلم انه هيبقى لعيب كورة مشهور مثلاً زى اللى بيشوفهم فى التلفزيون، فى ثانوى يحلم انه هيبقى مليونير فى منتصف العشرينات، يدخل فى العشرينات يحلم بإن يبقى عنده بيزنس خاص بيجيب فلوس كويسة وعربية أحدث حاجة، بعد العشرينات وبعد ماشاف الواقع ..احلامه بتوصل أنه عاوز يعيش عيشة كويسة بدون ضغط، ويشتغل فى شركة محترمة تقدره، مع الوقت بيبقى أقصى أحلامه إنه يدخّل ولاده مدارس ويعلمهم تعليم كويس ويحوش لهم قرشين ينفعوهم مع الزمن.. الخ. اسأل أى حد فى الأربعينات عن أحلامه قبل العشرينات كانت إيه وهو دلوقتى فين، وهتفهم الكلام ده كويس.

بالتالى لازم تعرف إن الحماس والطموح بيقل جداً جداً مع الوقت و تجارب الإنسان، وكل ما بتكبر فى السن بتزيد واقعية، إلا فى حالة واحدة بس، وهى انك تكون بتستغل أوقات حماسك بالشكل الصح وتعمل أقصى حاجة فيها ولو موصلتش للأهداف اللى كنت عاوزها على الأقل بتقرّب منها بشكل كبير، و مبتوصلش لمرحلة الواقعية الروتينيه المميتة، عشان كده استغل حماسك كويس على قد ما تقدر لأنك مع الوقت مش هتلاقيه.

https://www.facebook.com/Marketerhossamhassaan/posts/10153668893735833