التصنيفات
المدونة

عارف يا باشا ايه المشكلة

المشكلة إنك خليت شاب زيي كان في يوم من الايام عنده استعداد يضحي بحياته وأحلامه ومستقبله علشان البلد دي ، قاعد دلوقتي متنح ومبتسم ابتسامه صفراء قدام اللي بيحصل وعمال يقول ” بجد حصل كده ؟ .. لا حول ولا قوة الا بالله ”
اتعودنا نقولها كل فترة .. زي ما انتوا اتعودتوا تقولوا وسط الضحك
“اللهم اجعله خير”

خليت شباب كانوا في يوم من الايام بيفكروا في الحلول ، قاعدين متنحين وعمالين يفكروا في الهروب.. حتي مبقاش حد يعمل حسابه ياخد حد معاه وهو بيهرب..كله بيفكر يهرب لوحده

خليت شباب كانت بتحب البلد دي من غير أماره رغم انها مديالهم بالجذمه وكل يوم بتشوه إنسانيتهم و سرقت منهم احلي سنين عمرهم في مقابل ابسط “حقوقهم” ومع ذلك كانوا بيحاولوا يتجمعوا علي اي حاجة تنصفهم…قاعدين دلوقتي بينظروا علي بعض وبيشتموا في بعض

يا باشا انت بدل ماتستغل الطاقه اللي عندنا ، خليتنا نسخرها كلها في التريقه على غبائكم ، او في الهروب من جحيم دولتكم ، وانتوا فرحانين وقاعدين تشاوروا علينا وتقولوا ” بص ، مابيعملوش حاجه غير النقد ، مش عاجبهم حاجه ، بدل مايساعدونا ”

عارف يا باشا … انا نزلت أشيل الزبالة اللي في الشوارع في يوم من الايام ، دلوقتي مكسل أحزن على اللي بيحصل … كان عندي استعداد اشتغل ليل نهار من غير مقابل ، أروح الصحراء اللي كل شوية تعايرونا بيها دي وأحفر مع إني مش عارف هنحفر ليه … دلوقتي مكسل أطفي النور قبل ما أنام

كنا بنحاول نتابع الجديد ونقول اننا هانغير وقدرنا نغير فعلا حاجات كتيير وكنا بنفرح بيها ونعلمها لبعض ..دلوقتي اي حاجة بتتغير بنحطها في نظرية مؤامرة وانها طعم علشان نتلهي فيه .. بقينا نستخسر نكافيء نفسنا او حتي نشجع بعض

انتوا ماشيين في طريقكوا ومكملين وعاملين مش واخدين بالكوا ، واحنا متنحين ومكملين وعمالين نتريق ونفش غلنا بكام بوست علي كام تويته وعاملين نفسنا مش واخدين بالنا برضو … لا انتوا راضيين تتغيروا ، ولا احنا نافع نبقى زيكم

عرفت بقى يا باشا ايه المشكلة

منقول بتصرف من Ahmed Assaf