الناس اللى مش عارفين يعنى ايه ديب ويب Deepweb او دارك ويب Darkweb، الناس اللى واخده فكره ان الدارك ويب او الانترنت المظلم انه مكان مظلم بجد وعميق والوان بقى وبلالين اخضر واحمر واسود، وعالم مليان سواد وبتاع، بص ياسيدى، بعيدا من اللى انت عملت عنه سيرش او قريته او ما يخيل ليك ان الدارك ويب دا مكان اسود وله الوان وانك لو روحت هناك هتتخطف وتتفشخ، وكمية الصفحات الكتيره اللى بتهرى ببوستات ليها صور اقنعة وبتاع الخ، شيل من دماغك كل اللى تعرفه عن الدارك ويب او الديب ويب وخلينا نتكلم هنا بكل بساطه، حتى لو فى عندك اى استفسار اكتبه فى الكومنت وهحاول قدر الامكان انى ارد على كل نقطه، الدارك ويب دى مواقع انترنت عاديه شكلها زى المواقع العاديه بالظبط، مكتوبة بأى لغه من اللغات اللى تعرفها مش بالميه السحريه ولا بالحبر السرى، بس الفرق مابين المواقع العاديه ومواقع الدارك ويب ان مواقع الدارك ويب مش معمولها indexing “هشرح دا بإسهاب فى اخر البوست فى الفرق مابين deep and dark web” وولا تقدر تدخل ليها بواسطة الاتصال الانترنت العادى بمعنى ان مفيش محرك بحث يبحثلك عن اللى انت عايزه هناك، بمعنى انه مفيش دليل تليفون علشان تتصل بشخص معين الا لو كنت انت بنفسك عارف الرقم اما لو مش عارف فمحدش هيقولك عليه، وعلشان هناك مفيش رقابه على الانترنت فأى حد ممكن يفتح موقع بيبيع اى شئ عليه، تجارة اعضاء بشرية، قتل مأجور، دعارة القاصرات، سلاح، مخدرات، ادوات ممنوع تداولها، الخ، اى شئ انت تتخيله بيتباع هناك لأن الدارك ويب بكل بساطه دوله بلا رئيس او قانون الا ان مؤخرا بسبب رواج التجاره دى، ال FBI ابتدى يتعقب ناس، ونتيجة لصعوبه تعقب الاشخاص على الدارك ويب الا ان دا بيعتمد على مهاراتك التقنية الشخصيه “متقعش فريسه لأى هجوم تقنى” وبيعتمد على التكنولوجيا اللى بتستخدمها “بمعنى ان ميكونش فى ثغرات فى المتصفح المستخدم او فى الوسيلة اللى بتدخلك لل Router االمسؤول عن دخولك لل nodes اللى بتقوم من خلالها بالاتصال بالمواقع دا”. الدخول للدارك ويب مفهوش فلسفه ولا صعوبه، كل اللى عليك هتنزل حزمة كدا اسمها ToR Bundle ودا عباره عن مجموعه من الادوات والاضافات متحزمة بشكل بيسمحلك انك تتصل بشبكة ToR المسؤوله عن دخولك لل darkweb بالاضافه الى متصفح خاص “مبنى على متصفح فايرفوكس” هتنزلها وهتسطبها عادى جدا زى اى برنامج، هتفتحها، هيقوم المتصفح بالاتصال بال Router الخاص بشبكة ToR وبعدها هيقولك انه متصل بنجاح، مرحبا انت مهيئ لتصفح مواقع الدارك ويب، مهمتك بقى انك تكتب الموقع بإيدك وتروحله. المواقع على الدارك ويب مش بتنتهى بنهايات زى .com و .org و .net لا، بتنتهى دايما ب .onion ودا نسبة لإسم الروتر اللى بيدير كل مهمة اتصالك دى دى.
بالنسبة ل ToR Bundle انت مش بتختار المتصفح، ال ToR Bundle دى بتبقى مدمجه ومتظبطه بس على على المتصفح بتاعها علشان ميحصلش اى تسريب للهوية بتاعتك وتتكشف، اما بقى لو انت كنت شخص ذو خلفية تقنية سيكيوريتيه كبيره جدا تقدر تشغل دا مع اى متصفح تانى ولو انه خطر جدا وغير مرحب بيه ولا بيتم التوصيه بيه ابدا نتيجة لأسباب امنية تقنية كتيره.
.
العملة المتداوله فى ال darkweb هى ال bitcoin بأشكالها وبأجزائها litecoin، الخ..
.
حاجه اخيره، فى شبه خلط عند كتير من الناس “انا كنت واحد منهم من سنين” مابين ال Deepweb وال Darkweb مش عارف هيجيلى قلب واكتبهم ازاى بالعربى “الشبكة العميقه” و “الانترنت او الشبكه المظلمة” ان بص ياسيدى:
– ال Deepweb هو المعنى الاعم والاشمل، بمعنى ان الديب ويب بتحتوى على ال darkweb وكمان مواقع تانيه عاديه، الديب ويب هى اى مواقع تمت اخفائها من محركات البحث، المواقع اللى مش معمول ليها index خالص، بمعنى انت لو انت شخص وعندك سيرفر خاص بيك ومربوط بدومين ما على سبيل المثال mohamed.com وعندك فولدر على الدومين دا بإسم hola فبالتالى محدش يعرف المسار داhttp://mohamed.com/hola غيرك انت وبس، يعنى مفيش محرك بحث قدر يوصل للرابط دا فبالتالى الرابط دا هو جزء من ال deepweb وعادى جدا تلاقى هناك دومينات بتنتهى ب .com و .net و .org الخ
.
– ال Darkweb دا بقى الجزء المظلم من ال deepweb مظلم وعرفنا ليه علشان كل المحرمات والمواد الغير شرعية اللى بيتم تداولها هناك دى، الانترنت المظلم دا جزء غير مفهرس non-indexed وايضا غير قابل للوصول من خلال اتصال الانترنت العادى، مفيش دومينات هناك بتنتهى ب .com و .net و .org الخ كل الدومينات بتنتهى ب .onion وعلشان تقدر توصل للانترنت المظلم دا لازمك تحميل الحزمة اللى اتكلمنا عنها Tor Bundle.
.
اه صحيح لازم يبقالك خلفية تقنية كبيره جدا علشان تعرف تتعامل هناك، هناك انت بتتعامل مع اشخاص بدون ضمير، بدون اخلاق، بدون اى وازع دينى، شرفى، الخ، هناك بتتعامل مع مجرم محنك، نصاب، ذو خلفية تقنية شبه قويه “على حسب” فلو عايز يسرقه او يكشف هويتك وانت شخص عادى هيعمل دا بسهوله جدا وهتقع زى الشوال.
.
دا لينك تنزيل Tor Bundle اللى هتستخدمها فى دخولك للدارك ويب: http://q.gs/AMXKL
دا لينك لشرح كيفية عمل موقع واستضافته والحصول على دومين على الدارك ويب:http://q.gs/AMXKF
.
وبس كدا، ميجيش حد يضحك عليك ويحطلك ماسكات انونيموس ولا ماسكات fuck society ولا حاططلك بروفايل بكتشر سودا ولا حمرا ولا كاتب انه مستر روبوت ويقولك اوعى وشك بقى والديب ويب وهاتك يارغى، لا كل اللى كتبتهولكم دا هوا الصح، خد البوست وحطه ف وشه وقوله بلاش فتى!
https://www.facebook.com/SymbianSyMoh/posts/1526816167333465