التصنيفات
مقالات الضيوف

4 مراحل للتعلم

ال model ده أول مرة شفته من حوالي ١٥ سنة
و هو من الحاجات المهمة فعلاً و بتساعد المديرين الجداد في التعامل مع الناس الي بيشتغلوا معاهم
و كمان مهم للتطوير الذاتي

ببساطة هو بيقول إن أي مهارة جديدة بتتعلمها بتمر فيها ب ٤ مراحل

أول مرحلة الي بتكون فيها ما تعرفش حاجة خالص
بتكون unconsciously incompetent
يعني ما تعرفش إنك ما تعرفش
زي حزلئوم كده لما سراج بيه سأله بتعرف تسوق عربيّات ؟! قاله ما اعرفش لإني ما جربتش، مش يمكن لما أجرب أطلع بأعرف ??

الأطفال الصغيرين كمان بيفكروا بنفس الطريقة
هو ما يعرفش إنه ما يعرفش و فاكر إنه لو حاول هيعرف
هنا يبقى أول حاجة تعملها هي awareness
نعرفه انه ما يعرفش عشان يكون مستعد انه يتعلم و يتقبل التعليمات

المرحلة التانية هي لما يعرف إنه ما بيعرفش
Consciously incompetent
هنا هو جاهز لتلقي التعليمات عشان يتعلم المهارة الي ما يعرفهاش
دي مرحلة التدريب و التعليم

المرحلة التالتة هي لما بنتعلم المهارة الجديدة دي و نبدأ نمارسها
خلاص اتعلمنا قواعد السواقة و بدأنا نجرب و نسوق في شوارع فاضية و بعدها شوارع زحمة شوية
و بنكون عارفين اننا اتعلمنا
Consciously competent
انا عارف اني عارف و باطبق القواعد الي اتعلمتها

المرحلة الأخيرة بتيجي بعد فترة من الممارسة
بتوصل لمستوى متقدم في المهارة دي انك بتعملها بأقل مجهود و ببساطة جداً لدرجة انك بتنسى التعليمات و بتعملها بتلقائية
Unconsciously competent
اي حد بيسوق لفترة طويلة ما بيفكرش هو محتاج يعمل ايه
بيعمل كده ببساطة و تلقائية و ممكن جداً تلاقيه بيعمل حاجات تانية كمان في نفس الوقت
بيشرب قهوة و سيجارة و بيتكلم في التليفون و مشغل الكاسيت
و مش مركز خالص في السواقة و ايه الخطوة الجاية الي المفروض اعملها

المرحلة دي بتقفل دورة تعلم المهارة دي و بتتنقل بعدها لمهارة غيرها تكون في المرحلة الأولى بتاعتها
Unconsciously incompetent

مهم قوي مرحلة الوعي Awareness لإنك من غيرها مش هتسعى إنك تتعلم لإنك مش شايف حاجة ناقصة
و دي المرحلة الي بيكون عندك فيها إستعداد و قابلية و شغف للتعلم
المرحلة الرابعة كمان مهمة جداً لإننا أحياناً لما بنتقن المهارة قوي بنبدأ ننسى القواعد الأساسية و بنرتكب أخطاء زي المثال بتاع الي بيسوق و بيتكلم في التليفون و يشرب القهوة و السجاير و ما بيديش إشارة و بيعدي العربيات من اليمين عشان هو واثق في قدراته جداً
معظم الي بيعملوا حوادث كبيرة بيكونوا من دول
عشان كده محتاجين نفكر نفسنا كل شوية بالأساسيات من تاني
Back to basics
عشان نفضل محافظين على مستوانا من المهارة
و هنا بتيجي أهمية التعليم المستمر
Continuous learning
وصولنا للمرحلة الرابعة هو سلاح ذو حدين و له مخاطر

ال awareness مهم جداً و تطوير الذات مهم جداً
بلاش تنسى أو تتناسى أهمية التعليم المستمر و تطوير الذات و تقع في الفخ الي بيقع فيه ناس كتير و بيكون السبب في إنهم بيرجعوا لورا في الوقت الي المفروض يكونوا فيه بيتقدموا

و أي Team leader لازم يشتغل مع الناس الي معاه على كده
لازم كل شوية Refresher للأساسيات
مش عيب أبداً إننا كل شوية نعمل Back to basics
بالعكس تماماً دي حاجة في منتهى الأهمية عشان نفضل دايماً نعمل الحاجات بالشكل الصحيح و نقدر نطور من نفسنا

https://www.facebook.com/MamdouhElNakeeb/posts/10155100366371121