نقفل الراوتر ونستنى عشر ثواني بعدين نفتحه تاني

– نقفل الراوتر ونستنى عشر ثواني بعدين نفتحه تاني
– ماشي
– لمبة الدي إس إل عامله إيه مع حضرتك
– والله أصيلة ومريحاني
– أيوة يعني منورة؟
– بتنور وتطفي
– السلك الرئيسي واصل بـSplitter ؟
– لأ، واصل بالراوتر على طول
– فيه لحامات على السلك؟
– لأ
– يبقى فيه روزيتا
– لأ برضه
– إزاي يا فندم؟
– أنا إشتريت نوع سلك من برة فيه في آخره جاك، عشان لا تقول لي لحام ولا روزيتا.
– طاب السلك بيعدي جنب أي أجهزة كهربائية أو تكيفات؟
– لأ
– السلك متعرض لشمس جامده أو مية؟
– لأ..أنا ممشي السلك في ماسورة معمولة من الفولاذ عشان يحمي السلك من أي عوامل خارجية.
– فيه أي حيوانات أليفه في البيت؟
– لأ
– عندك حضرتك أولاد أو إخوات صغيرين أو أي أطفال في البيت؟
– لأ
– حضرتك مشترك في أي نوادي أو قصور ثقافة؟
– لأ
– طاب بالنسبة لجيران حضرتك، هل عندهم أي أجهزة كهربائية في بيتهم؟
– لأ..أنا ماليش جيران
– زرت اي دولة من دول حوض النيل في آخر عشر سنين؟
– لأ.
– فيه حد في البيت بيشتغل محامي أو مهندس أو دكتور؟
– الوالد دكتور.
– آآآآه…حضرتك والدك دكتور بقى له أكتر من عشرين سنة؟
– أيوة ليه؟
– ماهو يا فندم أي دكتور بيشتغل من زمان كده كان بيستخدم مادة الإيثر في التخدير، والمادة دي بتسيب آثار غير محسوسه وجزيئات ميكروسكوبية داخل الرئة لسنين طويلة، وممكن لو والد حضرتك عطس مرة في البيت في آخر خمس سنين، الجزيئات دي تطلع منه وتنتشر في الجو، وبتستقر على سلك النليفون، وبتاكل في السلك وبتكون فيه ثقوب مبكروسكوبية وهو ده اللي بيخلي السلك فيه مشكلة وبيأثر على وصول النت لحضرتك بشكل جيد.

– معقول؟
– طبعاً طبعاً، دي حاجه معروفة يا فندم
– يعني أكيد المشكلة مش من عندكوا؟
– لأ يا فندم..المشكلة عند والد سعادتك.
– طاب متشكر جداً..أنا هاغير الوالد.
– تحت أمرك يا فندم..أي إستفسارات تانية؟
– لأ شكراً
– شكراً لإتصال حضرتك بـ تي إي داتا