التصنيفات
مقالات الضيوف

نصيحة بتمشي مع كل شي

في كلَ السياقات.. بشكل عام

– أعطيني نصيحة..

– بخصوص شو؟

– ولا بخصوص شي.. هيك بالعموم.. بدون ما أحكي لك بخصوص شو.. يعني نصيحة بتمشي مع كل شي.. زي الملح هيك..

– نصيحة زي الملح!؟؟ مممم.. مشاعرِك مش مهمّة..

– ههههه.. كيف مش مهمّة يا زلمة؟ هو الإنسان عايش عشان شي إلَا مشاعره!؟

– والله مش مهمَة.. أو عشان أكون دقيق، مبالغ في أهميّتها..

– في أي سياق طيّب؟

– في كلَ السياقات.. بشكل عام.. يعني الإنسان بطبيعته بشتغل عشان مصلحته.. واللي جزء كبير منها مشاعره.. فيمكن يشوف هذا الكلام مش منطقي.. لكن لمّا يقرر إنّه مشاعره مش مهمّة.. وترسخ هاي القاعدة بعقله، ببطل يستخدمها كبوصلة لقراراته.. وبالتالي بلجأ لخيارات أكثر عقلانية وبحصل على نتائج أفضل.. ومنها مشاعر أفضل.. لكن هيك بتكون تحوّلت المشاعر لمنتج نهائي لقراراته.. مش عامل مؤثر فيها.. واللي هو مكانها ودورها الصحيح..

– حتّى في الحب؟

– خصوصاً في الحبّ.. لأنّه كلّ الناس اللي أخذوا قرارات عاطفية في علاقاتهم العاطفية، انتهت فيهم الأمور بحزن طويل وندم.. اللي انبسطوا اللي كانوا عقلانيين.. وعملوا الشي الصح، بغضّ النظر عن مشاعرهم تجاهه..

– بقدر الإنسان يعمل هيك؟

– الصبر بالتصبّر والعقل بالتعقّل.. والطبع بالتطبّع.. اللي بدّه بقدر..

المصدر