الناس دايما بتحب تقول نصايح في وقت النجاح،
بس وقت الفشل بيكون الشعار الدايم والأصوب الحقيقة هو “كان (القرد)نفع نفسه”، ومشوها (القرد).
انا بما اني في واحدة من اعظم ايام فشلي، وفي نفس الوقت غير قادر على ممارسة أي نشاطات لظروف المرض،
قررت اني أعكس الآية وأقول نصايح من واحد عنده كل مقومات النجاح وفشل،
وأهي بردو فرصة اني افكر نفسي بالغلطات اللي عملتها وباعملها واتمنى اخلص منها. ….
١- ماتقللش من قيمة شغلك ولا قيمة ما تستحقه مهما حصل، ولو قررت تعمل ده قول انك بتعمل ده، يعني “الشغلانة دي هتتكلف جنيه بس انا هعملهالك بربع جنيه عشان احنا اصحاب” بشكل واضح وقاطع.
٢- ماتتكسفش تقول لا او تطلب كتير لو الموضوع يستاهل، عشان اما يطلع مايتينك وانت شغال “وهيطلع مايتينك”يبقى بتمنه.
٣- الانطباعات الاولى تدوم، واللي عرفك من عشر سنين هيفضل طول الوقت بيتعامل انك نفس الشخص اللي من عشر سنين، وده حلو في العلاقات الانسانية بس مش حلو في الشغل، اللي كنت بتعمله من ١٠ سنين خلاص بقا قليل عليك دلوقتي فما تقبلوش افضل لك وافضل له.
٤- ماتحاولش تثبت نفسك لحد، العالم ماشي بالتعريص اصلا، لو مبتعرفش تسوّق اسمك دور عاللي يسوّقهولك، لكن ماتبقاش فاني عمرك في الشغل عشان ييجي حلوف شغال بالواسطة يقوللك وريني انت تعرف تعمل ايه.
٥- ماتبطلش تتعلم، أبداً
٦- ما تعتمدش على تقدير الناس، الناس ما بتقدّرش، ومفيش حاجة اسمها هيبقى بيننا شغل تاني، ما بيبقاش، ولو بقى بيكون بنفس الوضع الخرة.
٧- لو هتبتدي من الصفر تاني مش عيب، بس ابتدي في كارير جديد مش نفس كاريرك.
٨- الحياة قاسية، فيا تكون أد الحياة يا تعيش وحيد وسط الدروب ومش عارف تكون اد الحياة ازاي الصراحة، احنا متفقين ان القرد مانفعش نفسه.
٩- جودة شغلك مهمة فشخ، بس فيه منك كتير، فاهتم بوجود اسمك عالترابيزة طول الوقت، معظم اللي بيجيبوا الشغل مالهمش فيها اصلا وبيتعاملوا مع الاسامي اللي بتتردد عالودان وعالسمعة، بغض النظر عن جودة منتجهم.
١٠- كل حاجة بتعدي، بحلوها ومرها، فهتعدي ماتقلقش، وباقولهالك وانا في النص لسه مش وانا ايدي في المية خالص.