– هتهز ثقة إبنك في نفسه، وانت فاكر انك بتعلمه الأدب،
هيقضي عمره كله يحاول يتأكد إنه بني آدم كويس، ومفيش أي حاجة هاتأكدله
– هتحسسه بالذنب، وانت فاكر إنك بتعلمه يتحمل المسئولية،
هيقضي عمره كله يطلب من الناس المغفرة والسماح على ذنوب ماعملهاش
– هتشوه صورته قدام نفسه، وانت فاكر انك بتعلمه التواضع،
هايقضي عمره كله بيعاقب نفسه بالفشل لأنه شايف انه مايستحقش النجاح
– هتتجاهل إنجازاته الصغيرة وانت فاكر انك بتشجعه يعمل أكتر،
هايقضي عمره كله يشحت من الناس التقدير اللي مش عارف يديه لنفسه..وهايفضل بائس حتى لو كان أفضل من كل اللي حواليه
– هاتخليه طول الوقت عايش في قلق ومش متطمن وانت فاكر انك كده بتمارس سلطتك كوالد،
هايغرق طول عمره في سلوكيات إدمانية عشان تهديه..ويمكن يضيع عمره كله وهو لسه مش عارف يرجع
– هاتجوعه للحنان والمحبة وانت فاكر انك “بتنشف عضمه”،
هاتنشف روحه ومش هايعرف يديهم لحد، ويضيع عمره في الوحدة، أو في العلاقات المريضة
التربية بالحب والقبول معادلة بسيطة بس التحدي الكبير اللي فيها انك محتاج تشتغل على نفسك قد مانت محتاج تشتغل على ولادك..إن ماكانش أكتر