أنا حقيقي مندهش من إننا لسه محتاجين نشرح بيديهيات في الشغل زي إن مش التطور الطبيعي لأي حد شاطر technical في مجال ما إنه يبقى يوما “مدير” .. وإن كونه بقاله سنين شغال من غير ما يبقى Manager/ Team Leader فده عيب في حقه أو إنه مبيتعلمش مثلا. لأن سكة ال management ديه محتاجة معرفة ومهارات ومواهب وقدرات أو competencies تانية غير المهارات والمعارف التقنية اللي عند أي حد. وكونك شاطر تيكنيكال لا يؤهلك إنك تبقى مدير أو تدير فريق. الحتة ديه بتبقى محتاجة بوتينشال فعلا ويتعلم بالتدريب والقراية والممارسة. مش أي لعيب ينفع يبقى مدرب، يعني حد زي ميسي أو كريستيانو لو فضل طول تاريخه لعيب ومدربش مش هانقول عليه إنه مش شاطر أو متعلمش؟؟
الفكرة الغلط ديه مزروعة ومتغلغلة بسبب حلقة مفرغة بدأت من عند ناس شاطرة في حاجات تيكنيكال اترقوا لأدوار إدارية وهم مش مؤهلين لده ومحدش بيعلمهم ولا بيصلح وراهم، ففاهمين إن العك بتاعهم ده إدارة، وبقوا بيبصوا للي تحتيهم بنفس الفكرة ويرقوا ناس زيهم برضه شاطرين تيكنيكال وفي نفس الوقت {مش بيعترضوا على طريقتهم في الادارة وشايفينها مثل أعلى } وهكذا.
أضرار ده: “الحرق” .. إنت كحد صغير مش بتصبر على نفسك ولسه مش حكيم كفاية في تقديرك لذاتك وقدراتك وتلاقي واحد صابونة بيرقيك ويديك أدوار إدارية فتفرح بالمنصب الbuble ده وطبعا بتعك الدنيا وبما إنه لا عودة للوراء فبتفضل في المكان أطول فترة ممكنة لغاية لما تروح لمكان تاني كmanager برضه وهكذا .. إنت حرقت نفسك ودمرت كاريرك لإنك لا اتعلمت حاجة تيكنيكال ولا ركزت وصبرت على نفسك فترة ، ولا مارست مانجمنت صح. بتعدي عليك السنين وبتفضل في ليفل ال average وللأسف مش بتعديها فلا بقيت من ال ١٠٪ الجامدين تيكنيكال ولا ال ١٠٪ المديرين اللي الشركات بتدفع فيهم استثمار كبير عشان عارفة إنها هاتجيب حد يعرف يدير بكفاءة لأن تاريخه وسمعته سابقاه.
لو هانصح مديرين النهاردة هاقولهم استثمروا في الناس التيكنيكال الشاطرة انهم يبقوا أشطر وأكثر معرفة ، ومتداروش قلة معرفتهم أو الincompetency بتاعتهم بإنكوا تدخلوهم سكة الادارة عشان نقلل يا جماعة شوية والنبي من المديرين الجهلة اللي مش بيدوا فرصة للناس اللي تحتهم ولازم يفتوا ولازم يبقى كلامهم صح لأن محدش سبقهم في العلم والمعرفة .. سكة الإدارة محتاجة حد وصل لمستوى متقدم تيكنيكال في اللي هو فيه (مش أقل من ٤-٥ سنين مثلا في رأيي الشخصي – وفي حدود مجالي معرفش المجالات التانية ايه) وزي ما نقول وصل بشكل vertical لسقف النمو بتاعه، وعنده potential إنه يبقى مدير، مش بكونه فهلوي ولا بيعرف يتكلم أو يدير اجتماعات، بكونه كوتش حقيقي يعرف يحرك فرقة كاملة، يدير processes وشخص visionary وحاجات كتير ممكن تبقى تدوروا عليها.. ساعتها استثمر فيه يا سيدي وتعامل مع الموضوع إنه علم محتاج حد يعلمهوله ويmentor & coach him وتراقب تطوره وتصلح أخطاؤه لغاية لما تطلع مدير شاطر بجد.
صدقني لما متدخلش حد في سكة المانجمنت وتخليه يتعلم ويتطور تيكنيكال وتجيب فوقيه مدير شاطر ده بيخدمه قد ايه، وإن العكس هو اللي بيضره ويضرك ويضرني أنا شخصيا.
طبعا مش هاقول إننا مندخلش سكة المانجمنت الناس على أساس إننا بنحبهم أو صحابهم أو شغالين معانا من زمان أو الكلام اللي ملهوش لازمة ده
باختصار مفيش ترقيات ولا فلوس زيادة بعد مرحلة معينة غير ترقيات وفلوس إدارية، والناس بتدخل ده بفرح بس دي مفرمة لأنك بتفشل فبتعك جامد وتلطش بعدها لأنك عارف كدة أنك وصلت للسقف، فتبدأ سكك العلاقات، والتلبيس، وكل وساخات الدنيا بقى لأجل خلق سلم جديد لنفسك