هي المشكلة ان دوامة جلد الذات اللي انت عايش فيها مش حتوقف،
خلاط الافكار اللي شغال ليل نهار زي السكاكين في دماغك بيقول لك
“لو كنت عملت كذا كان حيبقي احسن” او “ازاي يحصل معاك انت كدة ؟! ” برضة مش حيبطل ..
حالة الشلل المعنوي اللي انت عايشه و معايش اقرب الناس ليك فيه مش حيتغيير..
كل الحاجات اللي ساحبه من عمرك و طاقتك مش حتهدي لمجرد انك عاوزها تهدي و خلاص…!!
بيقول لك:
forgive yourself for not knowing what you didn’t know before you learned it
و غلاوة السنة الجديدة اللي داخلين عليها..
لتسامح نفسك علي كل الحاجات اللي عملتها و مكنتش راضي عنها،
علي كل القرارات اللي خدتها بعد تفكير و برضة مطلعتش صح،
كل العلاقات اللي داخلتها بكل قلبك و كيانك لكن مكلمتش زي ما انت عاوز،
سامح نفسك علي اي حاجة عملتها قبل ما تعرف عنها كل اللي اتعلمته،
و اللي بالمناسبة عمرك ما كنت حتعرف او تتعلم من غير ما تعملها.
فانت خلاص مش حتعرف ترجع الزمن لورا و لا تمنع موقف خلاص اتاخد،
بس علي الاقل غير نظرتك للماضي .. متفضلش تقاوم حقيقته و تنكر علي نفسك حتميه تقبله .. بص لنفسك دلوقتي،
انت مش زي قبل كدة، انت بقي عندك مخزون يحترم من الخبرة، دفعت تمنه غالي اوي من مشاعرك و احلامك،
بس التمن ده انت اشتريت بيه مناعه و مصل لاي سموم تانية جايه لقدام
اشتريت بيه ادراك واعي قادر يميز لك كل الحاجات التافهه اللي كانت ممكن تضيع من وقتك و تستهلك من روحك قبل كدة …. اشتريت بيه النضوج .. و ما ادراك ده غالي قد ايه