ف مسلسل خلى_بالك_من_زيزى ناقشوا مشكلة مهمو بتواجهها البنت الصغيرة وهى إن إسمها قديم …
وللأسف المشكلة دى مبتخلصش مهما الواحد كبر
أنا كمان عندى نفس المشكلة إسمى الحقيقي “فوزية”
بابا سمانى كده ع إسم جدتى وعرفت إسمى وأنا عندى ٨ سنين ف المدرسة
للأسف حتى لو ك إنسان تقبلت إسمك إنت بتواجه تنمر طول عمرك يخليك تكره نفسك لدرجة إنى عيشت فترة طويلة أما حد بيسألنى إسمك الحقيقى إيه بقول أى إسم تانى …
تنمر مبينتهيش مهما كبرت ..
* ف المدرسة أول يوم دايماً كان أسوأ يوم عشان المدرس بينده وطبعاً مجرد ما بيتقال فوزية الضحك بيشتغل ..
* ف إعدادى المدرسين والطلبة كانوا بيقولولى ي فوزى ع سبيل الدعابة من كتر ما إتخنقت – جربت أنتحر بأدوية – ..
* ف ثانوى واحدة صاحبتى قالتلى أنا أما حد بيسألنى ع إسمك الحقيقي بقول زينب أهو أهون شوية من فوزية بدل ما يتريقوا عليا إن ده إسم صاحبتى ..
* ف تقديم الكلية الست بتاعت الشئون قالتلى إيه الإسم ده هو أبوكى إتهبل قدام كل الناس وقعدوا يضحكوا -حرفياً قعدت أعيط بصويت من كتر الزعل والقهرة –
* ف الجامعة أول يوم دخلت محاضرة جاوبت سؤال صح الدكتور سألنى إسمك إيه قولتله فوزية سمعت صوت من ورايا بيقول “أمال لو إسمك حلو شوية كنتى عملتى فينا إيه*”
* ف الشغل وأنا رايحة أستلم شغلى مديرة الفرع قالتلى لأ متخيلتكيش كده خالص أنا قولت جايبنلى واحدة قد مامتى ..
* وأنا برتبط بكريم قالى فلانة سألتنى ع إسمك وأما قولتلها قالتلى مش مهم أهم حاجة الأخلاق ..
* حتى لحد ما حملت وأنا بختار إسم بنتى إتقالى بالظبط إنتى آخر واحدة تحتار ف الإسم ي فوزية أكيد أى إسم هيبقى ألطف من إسمك
* من قريب بنوتة من المدرسة عملتلى تعليق وكتبت إسمى وأما قولتلها بالتهريج بلاش كتبت الإسم مرتين و هيوهيو يعنى …
* كريم رد ف كومنت ع بوست عنده وكتب إسمى الحقيقي بطريقة ساخرة يعنى والكومنت أغلب ال ريأكت عليه كان 
* أى حد من صحابى بيحب يرخم عليا يقولى ما بس بقى ي فوزية – كأنها شتيمة
ودى مواقف بسيطة جداً قصاد اللى كان بيحصل ولسه هيحصل ..
فكرة إنك تحب تراضى أبوك أو أمك أو أى حد ف الكون ملهوش علاقة بإسم ولادكم ي جماعة، مش بحاجة هتفضل ملازماه طول عمره،
مش ب أذية طفل طول عمره هياخد تريقة وتنمر بطريقة مش طبيعية وع سبيل إنها حاجة بتضحك وهى مش بتضحك خالص ومفيش حاجة إسمها الإسم حلو أو حبيه لأن حتى لو إتصالحت مع الإسم هتلاقى مليون موقف يخلوك تكرهه وتكره نفسك
بلاش تعملوا كده ف ولادكم
الموضوع مؤذى فوق ما تتخيلوا ومحدش هيحس بيه غير اللى بيعيشه كل لحظة ف حياته