– مساء الخير يا فندم مع حضرتك سامح من شركة تميمة، اسمحيلي حضرتك أقولك عروضنا التسويقية الشهـ…
= شكرا مش مهتمة..
– أنا عارف إنه سابك امبارح..
= نعم؟
*يبص في رسايل موبايلها اللي باينه عنده عالشاشة*
– ويسيبك بمسج كدة كأن مكانش بينكو حاجة! .. انتي تستاهلي أحسن من كدة!
= أنـ..
*يفتح حسابها على إنستجرام*
– والصورة اللي حاططها مع صاحبتك بعد ما يسيبك بيوم واحد .. تؤ تؤ
= إز..
*يفتح الـSearch history بتاعها*
– بعد كل السيرش اللي عملتيه على جوجل عشان تلاقيله أحسن هدية!
= *تبدأ في العياط*.. خسارة فيه!
*يقلب في الـ Web history*
– وكل المقالات،والنصايح الغريبة اللي قريتيها على موقع كوزمو عشان خاطره!
= *نحيب مكتوم*.. مايستاهلش!
*يفتح حسابها على فيسبوك*
– لا ويرد عالبوست اللي كتبتيهوله في عيد ميلاده ببرود ايدين عيان جتله جلطة في الشريان العضدي.. اخص
*يسكت شوية ويسيبها تكمل عياط*
– بس انتي مايهمكيش .. انتي سترونج كونفيدنت إندبندنت وومان .. ومش محتاجة لراجل زيه.. راجل ايه .. دا ماحصلش حتى Tester رخيص لإزازة ريحة رجالي..
= *شن شن* .. أيوة .. حقير.. *كح*
– انتي دلوقتي محتاجة تركزي على نفسك، وعلى احتياجاتك انتي، شغلك وكاريرك ..
= *بتنف* أيوة صح..
– محتاجة اللي يدلعك وياخد باله منك
= *شن شن* .. قصدك يعني أجيب كلب؟
– *يهمس بهدوء* تؤ تؤ .. انتي محتاجة فـلـتـر!
= *بتنف تاني* .. فلتر إزاي يعني؟
– فكري كدة.. الفلتر هيديكي كباية مية نضيفة لما تروحي، مش هتحتاجي تغيريله غير كل تــــلات شهور، فيه خاصية السمارت فلتر، هيقولك صباح الخير وانتي بتعملي قهوتك الصبح، ، هيشغلك أغاني ويقولك أخبار الطقس قبل ماتنزلي عشان تعرفي تلبسي ايه، وينورلك بالليل لما تدخلي المطبخ في الضلمة عشان ماتتكعبليش.. هو دا اللي هيعوضك
= تفتكر كدة؟
– انتي هتخسري ايه.. جربيه تلات شهور وشوفي.. هابعتلك واحد ومعاه Foot massager هدية..
= ميرسي أوي ..
– تحبي تـ recommend حد من أصحابك ممكن يبقى مهتم بالعرض؟
= نيفين فركشت باين..
– لا ابقي بصي على واتسابك، هي لسة باعتالك إنهم رجعوا لبعض..
= طيب فيه هند خطيبها سابها، نمرتهـ..
– خدتها من الفون بوك بتاعك خلاص.. ستاي سترونج يا حبيبتي.. شكرا لتعاملك مع شركة تميمة