ركز في الحته ديه كدة :
Don’t let your loneliness make you reconnect with toxic people. You shouldn’t drink poison just because you’re thirsty
متخليش وحدتك ترجعك للتواصل مع ناس مؤذية ، مينفعش تشرب سم لمجرد انك عطشان
لو ركزنا في اغلب دوافع الانسان اللي بتوديه في الداهية حنلاقيها قايمه علي النقطة ديه ، ان الانسان يكون تحت رحمة الحاجة, فعطشه حيخليه يشرب اي قرف يتقدم له!
غصب عنه، فقراره هنا مدفوع بغريزة و خوف
حتي علي مستوي صناعة مجمتعات القهر، الانظمة الدكتاتورية بتحرص دايما ان شعبها يكون جعان و محتاج .. عشان اي زبالة تتقدم له يجري عليها و يصقف لها..
عارفه انه لو شبع مش حيرضي بالزبالة اللي موجوده
ساعات كتير بيكون غضب الانسان تجاه ذاته انه جعان؟!
جعان تقدير، جعان احترام، جعان حب … إلخ
فهو بيعاقب نفسه علي جوعها ده، اللي كانت نتيجة تريبة غلط او قناعات متخلفة .. فهو مستاء انه بالضعف و الحالة المزرية ديه ؟! .. عشان يبقي السؤال الأهم،
ازاي مبقاش جعان؟! ازاي مبقاش عبد للحاجة؟
كل واحد ممكن يكون عنده رؤية خاصة لمفهوم الصيام، بس انا حاتكلم عن رؤيتي الخاصة، في الصيام الانسان بيكون جعان، و الهدف مش انه ميجوعش، إنما جعان بس مروض جوعه.. يروض احتياجه الجسدي من شهوة الأكل.. نفس الفكرة لو تعاملنا مع شهوة الظهور، شهوة التملك، شهوة الـ أنا
فالقضية مش اطباء نفسيين محصلوش او لايف كوتشز يطلعوا يكلمونا ازاي نعيش حياتنا! ..
إنما ارادة حقيقية من الانسان انه يروض إحتياجاته ..
مش يكبتها و يقهرها فيقتل جزء اصيل من روحه،
و لا يكون عبد لها في اول ما تطلب معاه يبقي زي العيل مش علي بعضه غير لما يعمل اللي عاوزه.