الناس اللي بتهاجم كوبر وبتطالب بأداء هجومي أكتر على خلفية انهم شايفين المنتخب “بيلعب حلو” وليه التحفظ وعندنا لعيبة كويسة دي، اغلبها مخدوع جدا في قدرات ومستوى اللعيبة بسبب ان شكلهم حلو جوا سستم كوبر.
لعيبة زي حجازي وجبر مثلا، شكلهم حلو في الملعب وخط دفاع كويس عشان كوبر بيلعب Deep. فالسيستم بتاعه مخلي المهاجم جي في وشهم دايما، فمبروز نقط قوتهم في المان تو مان وفي التقاط الكور الطولية العالية اللي هم شايفينها، ومخبي نقط ضعفهم الواضحة جدا في البطء وقلة المرونة، لو لعبت بشكل هجومي وقدمت دفاعك، هييجي عليك كور يا اما مرمية في ضهرهم يعني هتدخلهم في سباقات سرعة هم مش قدها، او مساحات لمهاجم مهاري يرقصهم في مساحة بسهولة لان مرونتهم محدودة. وكمان باكاتك الاتنين سرعتهم محدودة وكبار في السن، لو لبعت هجومي ومستني منهم زيادة طول الماتش وجري وفتح مساحات لياقتهم مش هتجيب، انت حاسسهم كويسين عشان السيستم مخليهم متراجعين ومش فاتحين مساحات وراهم وبيطلعوا بحساب فمش بيخشوا في سباقات كتيرة ولا بيبذلوا مجهود “باك طاير”
خط وسطك كلهم مش “لعيبة كورة”، مهماش حسني عبد ربه، كلهم Destroyers، ف وانت مقرب مساحاتك سهل يغطوها وتشوف طارق حامد نجم كبير عالدايرة لانه نقطة قوته مجهود وفير والتحامات، لكن افتح مساحات واطلب منه يطلع ويسلم ويستلم ويشارك في الTransition، هتشوف نسخة حامد الزمالك اللي مطلوب يهاجم، نسخة زي الخرا عايزه تتقتل. والنني لعيب كويس positional وبيملى مساحات وبيسلم ويستلم بس مش visionary ولا creative ولا تستنى منه باص طول ذكي او دقيق، لو لعبت متقدم نقط قوتهم هتروح ويتكشف محدودية قدراتهم الهجومية.
وتريزيجيه شكله حلو رغم انه لعيب على قده جدا، هو بس ميزته انه طاقة كبيرة ويقدر يقدم زيادة دفاعية وهجومية، فجوا السيستم ده لعيب مهم لانه بيديك بالانس انه بيدافع وكمان water carrier بياخد الكورة يطلع لقدام بسرعة ويساعد مجموعة الهجوم القليلة. لكن متنسوش يا جماعة انه في النهاية لعيب مقدرش يبقى عالدكة حتى في اندرلخت 
وبيلعب في فرقة تعبانة في تركيا.
وخط هجومك، بعيدا عن صلاح، حتى مروان محسن مهاجم متوسط جدا، هو بس انت حاسس انه كويس مقارنة بباقي الزبالات اللي عندك، وعبد الله السعيد مهواش لعيب سريع اصلا والاعتماد عليه في اللينك اب اضطراري عشان تعرف تفتح مساحات لصلاح.
فبجد ما تتخدعوش في مستوى المنتخب ده ولا قماشة اللعيبة، لانه من اقل المنتخبات اللي عدت في تاريخ مصر اصلا، لكن اللي فارقهم tactical discipline عالي من مدرب كبير وتقيل فعلا
طبعا ليه عيوبه محتاجة تتصلح زي انه بيلبس اجوان من عرضيات كتير فواضح انه فيه تنظيم دفاعي مفتقد في الحتة دي، وانه مش لاقي حل للكاونتر اتاك رغم ان طريقتك لازم تضيف ليها وسيلة تعرف تشكل خطورة في الbreak يا اما فرصك هتقل كتير وهتفضل معتمد على ابداع فردي من لعيب واحد دايما