التصنيفات
مقالات الضيوف

ماتطلعهوش عليا

فرق كبير انك تساند حد وانك تتحول لمخدة يضربها ويطلع فيها غضبه

فى مشهد عبقري فى بريكنج باد،
فى الحلقات الأولى،
اول ما عرف والتر انه عنده سرطان وكان مضطرب ومراته ما تعرفش عن تورطه فى اى جرايم، وهى لسه فى قمة تعاطفها وبتسانده طول الوقت فى علاجه واضطرابه وبتستحمله،
حصل ما بينهم موقف يشوبه عنف من ناحيته
فجاه تحولت الست المحبة لجوزها المساندة الداعمة دى لغضب شديد، وقامت مزعقاله بشدة وقالتله
do not put it on me
يعني بالبلدي “ماتطلعهوش عليا”

انا وقفت عند المشهد ده حبه وبرغم انه قد يبدو غير مميز بس مانسيتهوش
فى شعرة فاصلة كده الناس ما بتميزهاش،
ما بين انا باحتملك .. انا معاك .. انا مساندك …
وما بين “ماتطلعهوش عليا”

فى فرق كبير انك تساند حد وانك تتحول لمخدة يضربها ويخبطها فى الحيط ويطلع فيها غضبه من حاجات انت مالكش يد فيها..
كأنك مرضه او احباطه او فشله وظروفه السيئة
مش كأنك انت بتساعده عليها الشعور ده حقير جدا..
الناس مش مخدات، ومش المفروض حد يقبل انه يكون مخدة
I’ll help you but i’m not your cancer ,, do not put it on me

المصدر