التصنيفات
مقالات الضيوف

ليه ميسي ما يلعبش ببلاش لبرشلونة؟

الحدث جلل، والتعريـ* فيه أكبر من أي حاجة شفتها قبل كده

* في تغريدة انتشرت في الساعات الأخيرة للصحفي الإنجليزي كولين ميلر المتخصص في كرة القدم الإسبانية،
بيقول فيها إن ميسي حتى لو كان عايز يلعب مجانًا لبرشلونة ماكانش حيقدر، ببساطة لأن قانون العمل الإسباني بيرفض إن العقود الجديدة تكون قيمتها أقل من 50% من العقود القديمة،
منعًا للتلاعب الضريبي يعني
(مثال: برشلونة يمضي عقد مع ليونيل بخمسة جنيه في الشهر، ويدفع ضرايب ع الخمسة جنيه في الشهر، والباقي ياخده شيكات من تحت الطرابيزة، فيبقى برشلونة كسب وميسي كسب والحكومة خسرت).

التغريدة دي غير صحيحة، والمصدر اللي اعتمد عليه ميلر كان قانون بيتم تطبيقه على الكرة النسائية في إسبانيا، ومفيش ذكر واضح لجزئية الـ50%، مصادر كتير زي فوتبول إسبانيا وبارسا يونيفرسال نقلت عنه لكن النظرية نفسها غير صحيحة، القانون الإسباني ما بيقولش كده.

2- يعني ميسي كان يقدر يلعب ببلاش؟
* لأ برضه، دلوقتي حالًا، فاتورة رواتب برشلونة بتمثل 110% من أرباحه، عشان برشلونة يقدر يدخل الموسم الجديد عادي محتاج يخفضها لـ70%، من غير ميسي خالص بعد ما مشي هي واقفة عند 95%، بالتالي حتى لو ميسي قبل إنه يلعب ببلاش، فبرشلونة محتاج يخفض قد مرتبه مرة كمان من باقي اللعيبة، إما ببيعهم أو بإقناعهم بالاستمرار بمرتبات مخفضة، وده الشيء اللي فشل فيه لابورتا طول الأسابيع اللي فاتت، باستثناء بيكيه وبوسكيتس حسب التقارير الصحفية، وبرشلونة كان محتاج إن أغلب الفريق يعمل كده عشان ميسي يقدر يتسجل حتى لو ببلاش، وللسبب ده برشلونة ما طلبش منه أكتر من الـ50% اللي هو وافق عليها، لأنه مفيش معنى إنك تمضي معاه عقد ببلاش (مستحيل قانونًا) وفي الآخر حيمشي برضه لأنك ما قدرتش تخفض عقود باقي اللعيبة بالنسبة المطلوبة.

نقطة كمان مهمة إنه الشيء الوحيد اللي بيرفضه قانون العمل الإسباني (واللي كمان بيتطبق على لعيبة الكورة عادي) هو إن أي حد يشتغل ببلاش، لكن دي نقطة فرعية، ونقطة فرعية كمان، بعض التقارير الصحفية غير المؤكدة بتقول إن ميسي حسب قوانين اللعب النظيف الجديدة للاتحاد الإسباني كان حيتسجل كلاعب جديد، مش مجرد لاعب قديم بيجدد..ده مالوش علاقة بإن عقده انتهى، هو ببساطة كل العقود الجديدة بتدخل تحت بند الإنفاقات الجديدة في قانون الليجا، لكن بشكل عام، نظام التجديد اللي بتتبعه أندية الكورة عمومًا هو نظام استثنائي، يعتبر قانونًا تمديد مش تجديد، لأنك بتفاوض اللاعب وبتوقع العقد الجديد وهو على ذمتك بالفعل بعدين بتقطع العقد القديم، إنما بالنسبة لأي موظف عادي في إسبانيا، ومن ضمنهم لعيبة الكورة، فالتجديد بيتم بداهة بعد انتهاء العقد الحالي عادي، هو ده التجديد بمعناه القانوني الأصح، مادام اللاعب/الموظف بطاقته الدولية/ورقه ما راحش لنادي/شركة تانية ما بين العقدين.

3- يعني ماكانش في أي حل غير إنه يمشي؟
* ببساطة لأ، في الواقع بقى، رحيل ميسي مش هو أهم مشكلة عند برشلونة دلوقتي، حتى بعد رحيله مازالت في مشكلة ضخمة في الرواتب لابورتا مش قادر يعالجها ولا يبدو إنه حيقدر يعالجها، برشلونة ممكن ما يقدرش يدخل الموسم أصلا لو الوضع ده فضل مستمر في الأيام الجاية، وحتى لو استغنى عن الأربع لاعبين الجدد اللي لابورتا ضمهم؛ جارسيا، أجويرو، ديباي، إيمرسون. الوضع بهذا السوء.

4- يعني العملية كلها سوء حظ عشان الكورونا؟
* لأ برضه، المراجعة المالية الأخيرة للنادي كشفت إن 10-15% بس من ديونه راجعه لخسائر بسبب الجائحة خلال الموسم اللي فات واللي قبله، 85% وأكتر بسبب سوء الإدارة وقرارات الإدارة السابقة في سوق الانتقالات من ناحية، وفي عقود التجديد مع اللاعبين الحاليين من ناحية تانية.

5- طب إشمعنى ميسي اللي تضرر من الوضع الحالي؟
* ميسي مش الوحيد، أي صفقة جديدة حيتطبق عليها نفس الكلام وميسي لأن عقده خلص في أول يوليو يعتبر صفقة جديدة.

6- طب ما كانوا يجددوله قبل ما عقده يخلص!
* حتروح تقدم قائمة اللاعبين المسجلين لليجا فحتترفض لأن برضه رواتبهم أعلى من المسموح بيه، نفس المشكلة برضه، كل الباقي تفاصيل شكلية وإجرائية.

7- أمال إيه حوار قرض CVC ده؟
* قرض قيمته 2.7 مليار يورو لأندية الليجا، نصيب برشلونة منه كان حيبقى 280-290 مليون يورو مقابل 10% من حقوقه الليجا التجارية وعقود رعايتها لمدة 50 سنة، والحوار ده في تضارب شديد في المعلومات.من ناحية، تيباس بيقول إن لابورتا لو كان قبل الاتفاق كان حيقدر يسجل ميسي وكل اللعيبة الجديدة بدون مشاكل، بس تيباس أصلًا منحاز للقرض وبيأيد الفكرة وبيحاول يجبر لابورتا وبيريز عليها باستغلال ظروفهم فمش شرط يكون كلامه موضوعي أو حقيقي.

من ناحية تانية، مصادر صحفية مهمة أبرزها ذي أثلتيك قالت إنه حتى لو لابورتا وقع ع الاتفاقية فكان حيبقى عنده مشكلة ضخمة، لأنه بنود الاتفاقية بتقول إنه المبلغ ده (الـ280 مليون يورو) ما ينفعش تستخدم منه أكتر من 15% على التعاقدات الجديدة، اللي هم حوالي 40 مليون يورو، ودول أقل من العجز في فاتورة رواتب برشلونة بكتير، خد بالك إن العجز قيمته 40% دلوقتي، أربعين في المية مش 40 مليون يورو.

القصة كمان فيها احتمال إن تيباس يكون بيحاول يجبر بيريز ولابورتا (المؤيدين المعلنين الوحيدين للسوبر ليج حاليًا) على إنهم يربطوا مصيرهم بالليجا وبالتالي تنتهي قصة السوبرليج دي تمامًا.

8- يعني لابورتا ضحى بميسي عشان السوبرليج!
* في رأيي لأ، سواء في سوبر ليج أو مفيش، لابورتا بيأيده ولا لأ، ما ينفعش أبدًا تاخد مني 10% من حقوقي في عقد البث وعقود رعاية الليجا دلوقتي لمدة 50 سنة، زي ما هو قال ده قرار ما ينفعش أي رئيس ياخده، إنت كأنك بترهن 10% من أرباح النادي، خاصة إن الـ280 مليون دول حتردهم أضعاف في نفس الفترة.

9- طب يعني هو ميسي كان حيلعب ببلاش حتى لو ممكن؟
* الحقيقة كان ممكن أفكر في الاحتمال ده لو ماكانش في ناس بره القايمة أصلا بتاخد 8 و9 و10 مليون يورو سنويًا ومش مستعدة حتى تخفض الـ50% بتاعت ميسي، أما إني أطلب منه يلعب ببلاش وسيرجي روبرتو بياخد 8-9 مليون يورو عشان يدفي الدكة طول الموسم فده عار ماعتقدش أي إنسان عاقل يقبله لنفسه، وببساطة في نسبة وتناسب، زي ما ميسي بياخد أكتر واحد فبالتبعية هو بيخسر أكتر واحد لما يحصل التخفيض، ولو كان باقي اللعيبة خفضوا وده كان الحل الوحيد الباقي (إن ميسي يلعب ببلاش) كان ممكن أبقى عايز ده، إنما أنا بنفسي أعرض على النادي إني ألعب ببلاش رغم إن 90% من اللعيبة ما قبلوش تخفيض 25%؟ وحتى لو تقبلت ده فإنت مش حتعرف تسجلني برضه غير لما تخفض مرتبات باقي اللعيبة، فإيه المنطق؟

10- طب ما كده يبقى ميسي مشي عشان الفلوس!
* أنا مابقتش مهتم قوي بصراعات الفانبويز اللي بنحاول نثبت فيها إن النجم بتاعنا أحسن من النجم بتاعكم أو العكس، الحقايق بتقول التالي:فابريزيو رومانو قال نصًا إن باريس عرضوا على ميسي كل ما يمكن عرضه وهو رفض..They offered him all the money can offer، ببساطة لأنه كان عايز يقعد في برشلونة، مش بس عشان النادي، بس عشان دي حياته وحياة ولاده ومراته وعيلته، ولو ميسي مش حيفضل برشلونة كنادي على الفلوس، فأكيد حيفضل مصلحة عيلته.
خلدون المبارك قال قبل كده إني حطيتله شيك فاضي يكتب فيه الرقم اللي هو عايزه وهو رفض.ميسي نفسه خفض مرتبه بنسبة 70% وقت الجائحة، ومن غير ما بارتوميو يطلب ده.في النهاية، ميسي قبل إنه مرتبه ينزل 50%، ده في حد ذاته شيء غير مسبوق في اللعبة، مفيش حد من الأساطير اللي الناس بتعتبرهم رمز للوفاء عمل ده ولا في حد حيعمل ده في تخيلي، وفرق ضخم بين ده وبين لاعب كان عايز فلوس زيادة (وده حقه برضه) ورئيس ناديه رفض ومشاه، مش فرق كبير، ده العكس بالظبط.

طبعًا الحقائق مالهاش مكان لأن المهم مين صوته أعلى في اللحظة دي، فحيتقال إنه مشي عشان الفلوس وهي دي النظرية اللي حتسود، والبوست ده مش رغبة في التصحيح لا سمح الله لأن محدش بيعرف يصحح الغوغائية والتعريـ* مهما قال، وبطبيعة مشجعين الكورة مستعدين يبقوا أوضع وأحقر خلق الله ويألفوا نظريات من العدم عشان يثبتوا أي حاجة عايزين يثبتوها، فمفيش جديد يعني، هو بس الحدث جلل، والتعريـ* أكبر من أي حاجة شفتها قبل كده بالتبعية،
هو مش تعريـ* أصلًا ولا تدليس، ده كذب صريح.

المصدر