ليه مش كل الناس عندها شغف ..
لا ببساطة في فرق بين الشغف والنجاح
في اغلب الحالات الشغف بيساوي نجاح ..لكن ده من نص الطريق
في اول الطريق الموضوع بيكون مختلف
في اول الطريق بتعمل حاجة انت بتستمتع بيها “من غير ما توريها لحد”
بتعمل الشغل المطلوب منك وبعدين بتعمل حاجة لنفسك بعد وقت الشغل وبعد المطلوب منك في الشغل
بتعمل حاجة مش مفهومة .. مش كل الناس هاتشوفها حلوة .. مش هتاخد عليها تقدير ولا حتي شكرا
بتعمل حاجة مبتتكلمش عنها ..لو اتكلمت بتكون طاير من السعادة بغض النظر ان اللي قاعد قدامك مش فاهم حاجة
بتترفض علشانها كتيير
بتتقبل نقد الناس اللي مش فاهمة ..مبيفرقش معاك اصلا
هاتبقي متستمتع بالتجربة من غير نتيجة
الشغف تجربة
تجربة الناس اللي بتروح السينما علشان يروحوا مع ناس – او حتي لوحدهم – لمجرد انه عايز يروح مش عايز يتفرج علي نفس الفيلم علي جهازه
الناس بتروح حفلات لمطربين/عازفين بتذاكر غالية علي الرغم من ان حاجاتهم كلها موجودة علي جهازهم علشان يشوفهم ويستمتعوا معاهم
بيروحوا الاستاد علشان يهتفوا مع بعض ويشوفوا اللقطة من غير اعادة
الناس بتقدر التجربة اكثر من الحاجة نفسها
الناس – والنجاح – هايجروا وراك لما تستمتع بتجربتك ..وتبدا تمتع غيرك بمشاهدة التجربة دي 