باشتري المنتج ب ٨
وببيعه ب ١٠
فتح جنبي منافس بيبيع ب ٩
أعمل إيه ؟!
شوف حضرتك
الموضوع هو حالة من التالي
إنتا عندك ميزة في منتجك تخليه أغلى من منتج المنافس
يبقى اشتغل على إبراز الميزة دي
ما تتوقعش إن العميل فاهمها لوحده
ولو العميل فاهمها وبيستعبط وعاوز ياخد منتجك بسعر المنتج الأقل قيمة
اشرح له ميزة منتجك . عشان ما يبقاش ليه حجة
منتجك زي منتج المنافس . ما لوش ميزة
لكن انتا اللي ليك ميزة عن المنافس
عندك ضمان أفضل . بتبيع آجل . عندك تشكيلة أكبر . خدمة ما بعد البيع أفضل . عندك خدمة توصيل
يبقى اشتغل على إبراز ميزتك للعميل
لا منتجك مميز ولا إنتا مميز
شوف هل المنافس قادر يجيب المنتج أصلا أرخص منك
بيجيبه ب ٧ ويبيعه ب ٩
بينما انتا بتجيبه ب ٨ وتبيعه ب ١٠
يبقى اجتهد إنك تجيب منتجك من مصدر أرخص
ممكن انتا بتشتري آجل وهوا بيشتري كاش
إنتا بتشتري كميات قليلة وهوا بيشتري كميات كبيرة
إنتا بتجيب من تاجر جملة . وهوا بيجيب من مصنع . أو بيستورد بنفسه
ممكن انتا بتصرف كتير على النقل للكميات الصغيرة . انقل كمية كبيرة مرة واحدة
ممكن انتا مأجر مكان كبير ع الفاضي . أجر مكان أصغر
ممكن انتا معين موظفين كتير بدون داعي . مشيهم
شوف مصاريفك الكتير فين
في الخامة ولا في التشغيل
وقلل المصاريف
اكسب من المنبع يعني . المكسب في الشراء
ليس كل ما سبق
وانتوا الاتنين زي بعض بالظبط
وهوا داخل يحرق
ف هنا أقول لك شوف . هل هوا بيحرق بمناسبة الافتتاح مثلا . لكنه مش هيقدر يكمل كده طول الوقت
أو بيحرق عشان بيصفي وهيخرج من السوق
أو ممكن يكون بيحرق من باب الغباء . حاسب حساباته غلط . ومش فاهم إنه بيحرق نفسه
في الحالات دي إثبت على سعرك . وسيبه يحرق شهر ولا شهرين
كده كده هوا هيخرج من السوق
بس هيخرج وإنتا سعرك ١٠
لو نزلت ل ٩ . وهوا خرج . هترجع ل ١٠ إزاي ؟!
لا ده ولا ده ولا ده
وانتا كنت واخد خير السوق . وبتكسب ٢ جنيه في القطعة لإن ما فيش منافس
لكن الأمر الواقع خلاص إن السلعة دي بدأت تنتشر . وبقى فيها منافسين راضيين يبيعوا ب ٩
فيؤسوفني أقول لحضرتك بيع ب ٩ زيهم