لابس فى حيطة

لو انتى بنت و مرتبطة و جيتى فجأه قولتلك شيلى العلاقة دى من حياتك و اوصفيلى حياتك ماشية و عاملة ازاى ؟! و اكتشفتى ان مفيش حياة ! معندكيش رد انتى بتعملى ايه غير انك مرتبطة ….. اعرفى انك لابسة فى حيطة .

لو انت ولد و جيت قولتلك هنسحب الشغل من حياتك ، و ها كلمنى دنيتك فيها ايه و بتقضيها وتعيشها بتعمل ايه و ملقتش اى حاجه لانك يا بتشتغل يا بتنام عشان تصحى تشتغل يا بتخلص باقى شغلك فى البيت قبل متنام ….. اعرف انك لابس فى حيطة .

لو انت اب و قولتلك شيل جانب الماديات من حياتك و احكيلى ايه الروابط بينك وبين ولادك او ايه هى حياتك معاهم و مدى علاقتك بيهم و ملقتش غير انك اب بيصرف ويسد احتياجات وبس ….. اعرف انك لابس فى حيطة .

لو انتى ام و ولادك لما بدائو يكبروا او قرروا يسافروا او اتجوزوا و لقيتى فجأه الحياة وقفت وانتى حياتك فاضية تماما مش بتعملى فيها حاجه لنفسك ….. اعرفى انك لابسة فى حيطة .

لو طفلك لما النور يقطع او الكارتون و الموبايل يبقوا مش متاحين لاى سبب و لقيتى انك بتعملى مجهود عشان تسكتية من زنة ومش عارفة تعملى ايه ويبقى ده وقت اللاشئ بالنسبالة ….. اعرفى ان طفلك لابس فى حيطة .

الحياة مش بتلف و تدور حوالين شئ او شخص واحد وبس ، لان لو ده حصل لما الشئ او الشخص دول ينسحبوا حياتك هتنهار …. الحياة فيها حاجات كتير و محاور كتير و بدايل كتير
عيش حياتك تستمتع بكتيررررر عشان لو عكاز اتسحب تبقى الحياة لسه ماشية و ممتعه و متعاشة كمان .

https://www.facebook.com/christeen.koko.9/posts/2124634544433595