كل ده رزق

المدرسة اللي دخلتها متأخر بعد ما أهلك حاولوا يقدمولك في مدرسة تانية وماعرفوش.. فاتعرفت فيها على صديق عمرك،
الخروجة اللي فوّتها علشان راحت عليك نومة فخرجت خروجة تاتية اتعرفت فيها عالبنت اللي بقت مراتك،
المطعم اللي ركنت عنده بالصدفة فكلت أحلى أكلة سمك كلتها من سنين،
الرواية اللي جت لك هدية فعجبتك، فحببتك في القراية، فبقيت بتقرأ على طول،
الراجل اللي ركب جنبك في الطيارة فنصحك نصيحة غيرت حياتك،
صاحبك اللي مات فجأة فموته عرفك حقيقة الدنيا،
الامتحان اللي حلّيت فيه وحش، فجبت درجة وحشة، فحرمك من الكلية اللي نفسك فيها وأجبرك على دخول كلية تانية لقيت فيها نفسك واشتغلت ونجحت،
ابنك أو بنتك اللي لقيته بيتخلق وبيتكون قدام عينيك، المرض اللي عرفك إنك ضعيف وعلّمك التواضع، أمك اللي من غير أي سبب منطقي مستعدة تديلك عمرها ، الحاجات الحلوة والوحشة اللي بتتحدف قدامك،

كل ده رزق، شبكة معقدة من الكلمات والأشخاص والأحداث والظروف والمشاعر بتشكل حياتك كل لحظة، كمية variables مش تحت سيطرتك مهما كنت شاطر، كمية من البشر ليهم فضل عليك من غير ما تعرف،

التأمل فيها بيعلمنا قد إيه الإنسان ضعيف، وقد إيه مريح إنك تستقبل الأقدار بنفس راضية لأنك ماتعرفش إيه اللي هيترتب عليها من خير أو شر.

وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ
وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ
وَاللَّهُ يَعْلَمُ وَأَنتُمْ لَا تَعْلَمُونَ

https://www.facebook.com/ahmad.fatehelbab/posts/10154227951489629