فاكت إيز، كل الناس بتعرف تحب أول كام شهر في العلاقة..
كل الناس!
هتلر وموسوليني ومرعي بتاع الكِلِمة وأبو رجل مسلوخة وأم ٤٤..
كلهم أكيد كانوا كيوت وحبّيبة في أول فترة في العلاقة عادي! حنينين وبيسهروا بالليالي على الواتساب، وبيجيبوا هدايا، وبيعملوا مفاجأت، وبيراضوا وبيتمنوا الرضا!
غصب عنهم أصلا.. أدرينالين على دوپامين على أوكسيتوسن على مجموعة هرمونات جنب بعضها، بتعمل حالة من اليوفوريا كأنك مسحور! عليك spell مش شايف ولا حاسس ولا سامع غير حبيبك. فعلياً الكيميا اللي مخك بيفرزها في مرحلة الinfatuation أو الإعجاب وحالة ال”وله” اللي في الأول دي، هي هي الكميا اللي مخ المدمن بيفرزها أما بيضرب المخدرات!
كلنا كده بنبقى high في حالة الspark الأولى وفيضان المشاعر دي.. بس الtrick الحقيقية بقى في بعد كده! في ناس بتاخد الspark دي وتعمل منها wildfire وتلاقي المشاعر دخلت في ليڤل أعمق وأنضج وحصل love & attachment والحب ولّع في الدرة.. وفي ناس السپارك دي عندهم بتتطفي وبتطفي معاها أي محاولات منهم أو مجهود أو مشاعر!
زيه زي الشغل بالظبط! كلنا ممكن نتحمس لفكرة وتصحينا من عز نومنا ونمشي نحكي عنها… لحد ما الموضوع يخش في الجد، والحماسة الأولى تروح ويظهر اللي بيعرف يشتغل فعلا من اللي كان بيجري ورا شوية هرمونات وإكسايتمنت!
الفكرة بقى إن كلنا بنقعد نقول الحب ده أسطورة أو حاجة غريبة love is a mystery! ممكن تلاقي نفسك بتحب ناس مكنتش عمرك تتخيل إنك تحبهم، وناس تانية perfect match بالنسبة لك وإنت ولا الدموع! ممكن يبقى حد روحك فيه انهاردة ويعدي وقت والحب يموت ويبقى أكتر شخص عايز تبعد عنه! Love is a mystery فعلا وحاجة صعب تتشرح جدا! بس في رأيي بصراحة إن في ناس بتستخدم الجملة دي عشان تبرر عدم تحملها المسئولية عن “صيانة” الحب ده! كأن الحب والعلاقة المفروض يمشوا لوحدهم كده ببركة دعا الوالدين ?
العلاقة دي حضرتك شغل full time! في ناس لا تُجيد غير المرحلة الأولى منها، والمرحلة الأولى دي أصلا مفيهاش مجهود رهيب منك عشان في هرمونات مساعداك اصلا! في ناس بتزق لك العربية.. بعدها بقى لو مادوستش انت بنزين وكملت سواقة وبذلت مجهود، العربية هتقف! ودي مش mystery الحقيقة، دي قوانين الكون في أي حاجة!
في ناس بتعرف تسوق أو أتليست بتحاول بجد.. وفي ناس “بتعرف تحبك” أو حتى بتتعلم تحبك.. وبتفضل تهتم وتاخد بالها منك وتعمل مجهود ومفاجأت وهدايا وsupport وكل الدلع ده حتى بعد ما هرمونات المراهقة تروح.. وفي ناس هما كام شهر وبعدها بتجيب ورا وتريّح وتفضل تديلك في ميت عذر وسبب لبرودها وعدم إهتمامها لحد ما يجيلك إنفصام وتحس إنك كنت بتحب شخص تاني أصلا في أول العلاقة والعلاقة تموت!
نتعلم نحب ياجماعة، مش عيب والله! نذاكر كده ونتعلم ونبذل مجهود عشان نبقى good lovers زي مابنتعلم أي حاجة تانية ?!
وعموما يعني نصيحة، ماتتخدعوش بسرعة بأول فترة ويسيطر عليكم موود “هو ده ايوه ده، هو ده الحب الحقيقي” ..كل الناس بتعرف تنبهر وتُعجب، بس مش كل الناس “بتعرف تحب” بعد مرحلة ال infatuation والإعجاب الأولاني .. وللأسف الحب الحقيقي هو اللي بعد اللقطة دي، وهو أنضج وأحلى من مشاعر المراهقة بكتير ?
https://www.facebook.com/h.elsawah/posts/10155816819981022