التصنيفات
افيون الشعوب

كذبة الصلوات الخمسة

أفيقوا يرحمكم الله

مفيش شخص مسلم تقريبًا مترباش من و هو طفل على إن الصلوات خمسة .. صبح و ظهر و عصر و مغرب و عشاء ..
بس محدش فكر قبل كدة هل الموضوع دا صحيح ولا لأ
و لو قلبنا في القرآن من أوله لآخره مفيش أي حاجة خالص بتقول الصلوات خمسة
و أتحدى أي حد إنه يجيب الموضوع دا ..

عمرك سألت نفسك لو كانت الصلوات بالأهمية اللي عمالين يقولوهالنا ربنا مشرحهاش في القرآن ليه ؟؟
لو عاوز تعرف الدين صح يبقى تسمع مني ..
عدد الصلوات المفروضة في القرآن فعلًا هم ٣ صلوات مش ٥ زي ما الفقهاء على مر التاريخ حاولوا يخدعونا و يوهمونا و الدليل من القرآن ربنا قال “أقم الصلاة طرفي النهار و زلفا من الليل” ..
يعني اول النهار و اخره و ساعة من الليل .. لو كانت خمسة ربنا كان قادر يقول “صلوا خمس مرات في اليوم” .. سهلة أهي

أي حد بقى ييجي يقول الفقيه فلان قال أو الإمام علان زاد يبقى بيكذب القرآن
و ربنا قال “ما فرطنا في الكتاب من شيء” ..

ميجوش هم بقى يوهمونا بالخدعة اللي كانوا نعيشينا فيها ..
احنا كمان عندنا عقول و بنعرف نقرأ و نفهم مش محتاجين حد يفهمنا ..
الدين دا مش بتاعهم هم بس

شايفين كل اللي أنا كتبته دا ؟؟
اهو دا من أوله لآخره كدة عبارة عن جهل مركب و “هبل” من اللي بيعمله إسلام بحيري و ابراهيم عيسى و اخواتهم الحداثيين في برامجهم و بيسوقوه تحت اسم “التجديد” و “إعادة فهم النصوص” …
و كلها كام سنة و يطلعلنا شاب من الشباب دول و يقول الكلمتين دول و كإنه منقذ المسلمين من الوهم اللي عاشوه لقرون و يقدملنا “الفهم الصحيح للدين” و يعمل زي شباب التنمية البشرية و يحرضنا نفسيًا بجمل زي
“احنا كمان عندنا عقول و بنفهم” “احنا مش محتاجين حد يفهمنا”
و دايما هيستخدم نبرة “احنا” و “هم” عشان يركز على حتى الانفصالية و يحاول يختلق صراع ..
و السيناريو معروف مش محتاج أكمله

ممكن واحد ييجي يقولي لا يا عم مش للدرجادي ..
هقوله و الله الكلام دا مش جايبه من عندي دا “الصحابة” ذات نفسهم أدركوا الكلام دا من بدري ..
و شوف كدة الحديث دا اللي رواه الحاكم في المستدرك على الصحيحين و هو موقوف و له حكم المرفوع إلى النبي ..
و الأثر ورد بنفس المثال اللي شرحته فوق و هو نفس اللي بيحصل دلوقتي تشكيك في كل ثابت ..

“لتُنقصن عُرى الإسلام، عُروة عُروة”عَن حُذَيْفَةَ ، قَالَ : إِنَّ أَوَّلَ مَا تَفْقِدُونَ مِنْ دِينِكُمُ الْخُشُوعُ ، وَآخِرَ مَا تَفْقِدُونَ الصَّلَاةُ ، وَلَتُنْقَضَنَّ عُرَى الْإِسْلَامِ عُرْوَةً عُرْوَةً ، وَلَيُصَلِّيَنَّ النِّسَاءُ وَهُنَّ حُيَّضٌ ، وَلَتَسْلُكُنَّ طَرِيقَ مَنْ كَانَ قَبْلَكُمْ حَذْوَ الْقُذَّةِ بِالْقُذَّةِ ، وَحَذْوَ النَّعْلِ بِالنَّعْلِ ، لَا تُخْطِئُونَ طَرِيقَهُمْ ، وَلَا يُخْطَأُ بِكُمْ ، حَتَّى يَبْقَى قَرْنٌ مِنْ قُرُونٍ كَثِيرَةٍ يَقُولُونَ : مَا بَالُ الصَّلَوَاتُ الْخَمْسُ ؟ لَقَدْ ضَلَّ مَنْ كَانَ قَبْلَنَا ، قَالَ اللَّهُ تَبَارَكَ وَتَعَالَى : { وَأَقِمِ الصَّلَاةَ طَرَفَيِ النَّهَارِ وَزُلَفًا مِنَ اللَّيْلِ } ، ثُمَّ لَا يُصَلُّونَ إِلَّا ثَلَاثًا ، وَتَقُولُ الْأُخْرَى : إِنَّا لَمُؤْمِنُونَ بِاللَّهِ كَإِيمَانِ الْمَلَائِكَةِ ، مَا فِينَا كَافِرٌ وَلَا مُنَافِقٌ ، حَقٌّ عَلَى اللَّهِ أَنْ يَحْشُرَهُمْ مَعَ الدَّجَّالِ
أفيقوا يرحمكم الله ..

المصدر