قواعد_ريادة_الأعمال_الأربعون

أنا رائد أعمال/شركة ناشئة:
1- أنا Founder لفكرة ملهاش وجود.
2- أنا CEO لشركة مفيهاش غيري.
3- إحنا 4 شركاء ومفيش موظفين وكلنا CEO وCOO وCTO.
4- أنا عندي فكرة عادية ومعمولة بس خايف أقولها لحد لا يسرقها.
5- أنا هعمل Product ردئ، لو نجح هبقى أطوره وأخليه أحسن.
6- أنا عايز أي حد غيري يصرفلي على مشروعي عشان خايف يفشل.
7- أنا سايب شغلي وأني أبني الProduct وأجيب عملاء وعمال أجري ورا الInvestors والبرامج.
8- أنا شايف أني بفهم في كل حاجة ومش محتاج أشارك حد.
9- أنا شايف أني مش بفهم في كل حاجة ومش عايز أعمل ولا حاجة بإيدي وعايز أجيب ناس تعمل كل حاجة.
10- أنا هاخد إستثمار وهجيب بيه Bean Bags.
11- أنا هعمل شركة لو فشلت هروح أتكلم في الإيفنتات.
12- أنا من عيلة مرتاحة وبدرس في جامعة بالشئ الفلاني وهعمل أبليكيشن عن الناس الفقيرة اللي أنا معرفش عنهم حاجة.
13- أنا هبيعي عربيتي اللي بربع أو نص مليون جنيه وهصرف بيها على مشروعي عشان أنا Risk Taker.
14- أنا هخلق حل لمشكلة ملهاش وجود وهخلق المشكلة عشان أحلها إن لزم الامر.
15- أنا هنفذ الفكرة دي عشان أنا عايز أستخدمها.
16- إحنا هنعمل زي الشركة العالمية اللي ناجحة هناك دي بس في مصر.
17- إحنا بنعمل الفكرة دي عشان نبيعها لأمازون.
18- إحنا معندناش منافسين (لأ عندكوا)، بس إحنا أحلى/أرخص/أطعم.. حتى شوف كدة.
19- إحنا هنطلب موظفين نشغلهم شغل Seniors ونديهم مرتب Juniors.
20- إحنا هنطلب Interns يجوا يتدربوا ويشتغلوا ببلاش وهنطلع منهم شغل بمليون جنيه.
21- إحنا هنعرض وظايف ومش هنبص على الإيميلات.
22- إحنا هنعمل معاك Interview لو أخرت عليه مش هنقبلك بس لو أخرنا عليك عادي.

أنا مبرمج:
23- أنا Full Stack Developer بكتب كل اللغات وأعرف كل الTechnologies ومش محتاج حد معايا يعمل أي حاجة ويلا إمشي إطلع برة.
24- أنا عندي فكرة أبليكيشن خطيرة مليانة Operation وLogistics بس إحنا تمام ومش محتاجين Business Partner.
25- أنا خريج ITI وعملت مشروع تخرج الكافتيريا الذكية.
26- أنا فنان لازم تديني مساحتي في الإبداع والتأمل والتأخير وعدم الإلتزام.
27- أنا Top Coder يابني وكنت ACM وعندي قدرات برزخية على الProblem Solving بس معلش والله مش هقدر أعملك الReal Life Application ده.

أنا Investor:
28- أنا هديك أقل فلوس وهاخد أكبر حصة.
29- أنا همضيك على عقود أنت مش فاهم فيها حاجة.
30- أنا همضي معاك بس هتأخر في دفع الدفعات وهساومك عليها.
31- إحنا هندي فلوس كتير فشخ لأقل ناس محتاجة فلوس وهندي فلوس قليلة فشخ لأكتر ناس محتاجة فلوس.
32- إحنا هنديك 200 ألف جنيه (الله أكبر).. بس خدمات.

إحنا برنامج/مسابقة لدعم ريادة الأعمال:
33- إحنا هنعلن عن جوايز ضخمة جداً بالملايين بس هتتقسم على 4 مراحل و3 فائزين.
34- إحنا هنجيب لجنة حكام من الناس المشهورة لكن مفيش متخصص في ولا مجال من المجالات المشاركة.
35- إحنا هنطلب منك تملى إستمارة تقديم مكونة من 15جزء و60 سؤال ودراسة جدوى مفصلة وفيديو بيشرح فكرتك ورقم بطاقة أمك وتنزل 10 ضغط وتروح لحد الجونة جري ولو إختارناك للمشاركة هنعمل معاك عشروميت إنترفيو عشان ممكن تكسب معانا 15 ألف جنيه!
36- إحنا مش هنقبلك عشان أنت مؤسس واحد للمشروع، طيب مش هنقبلكوا عشان أنتوا الإتنين Business ومفيش واحد Technical، طيب مش هنقبلكوا عشان أنتوا الإتنين Technical ومفيش واحد Business، طيب مش هنقبلكوا عشان أنتوا واحد Business وواحد Technical بس مش معاكوا واحد Domain Expertise.

أنا Mentor:
37- أنا معملتش ولا شركة نجحت وكملت فغيرت الCareer وبقيت Mentor.
38- أنا من يوم ما دخلت المجال وأنا Mentor مع أني مشاركتش في بناء حاجة بإيدي.
39- أنا بMentor على شركات وبتفشل فبقيت أMentor على شركات ناجحة بالفعل.
40- أنا هعلن عن صفحتي على إستشارات مجانية ولما حد يبعتلي هقيمه الأول ولو فعلاً محتاج الإستشارة مش هقابله لكن هقابل اللي مش محتاجها (إنظر النقطة السابقة).
#قواعد_ريادة_الأعمال_الأربعون