الواحد صحيح لسه بيتعلم كل يوم حاجات كتير جديدة في الحياة العملية، بس في شوية حاجات اتعلمتها اخر كام سنة كانت صادمة وغيرت في طباعي كتير، وياريتني كان حد فهمهالي وانا صغير شوية، فهقولهم لعل حد يستفاد بيهم.
الكلام ده ينطبق على 90% من الناس اللي هتقابلهم في حياتك كمصري، صحيح في 10% لا يسري عليهم ده، ولكن دي الغالبية العظمى.
1- انت ممكن متكونش بتحكم على الناس بالمظاهر، بس الناس هتفضل دايما تحكم عليك بالمظاهر، ومش بس كدا، انت موهبتك ومهارتك وقدراتك هتبقى رقم 2 في تقييمك بعد شوية المظاهر، واي واحد مظهره احسن منك هيكسبك ويوصل معاهم قبلك.
2- عدم وضعك الفلوس كقمة الأولويات في أي شغل او تعامل، بيقلل من قدرك مش بيزوده زي ما انت متخيل، انك تخجل أو تتنازل أو تمشي الحال، أو تقول لا نشتغل بس الاول بعدين نشوف الفلوس بعدين، دايما هيديك حجم أقل من حجمك وعمره ما هيطلعك لقدام.
3- الدخلة الصح، وتظبيط الشغل، وفرش الفرشة المظبوطة لأي موضوع، هما أساس كل حاجة، الشغل الصح ده تبقى تعمله بعدين إن شاء الله لما توصل للي إنت عايزه، علشان تبني عليه نجاح حقيقي، لكن إنك تعتمد إن شغلك اللي هيقوم بالواجب، هتلف الميدان 5 مرات بدون فايدة.
4- معاك شغل كتير وبتطلب فلوس كتير، يجيلك شغل كتير وفلوس كتير، بقيت متاح في اي وقت وبتطلب مبلغ معقول، هيتفهم إنك واقع وأي مبلغ عادل هتطلبه هيستكتروه عليك ويتقص للنص ويتقال هو طايل! كفاية عليه كدا!
5- أي تعامل شغل اكتشفت فيه سرقة، اتقل ومتخليش الجلالة تاخدك وتروح تكشف الحرامي لصاحب المال، علشان في حالات كتير هتكتشف إن صاحب المال عارف إنه بيتسرق وساكت علشان هو بيسرق سرقة أكبر من ورا الشركة. خد وقتك يا عم كرومبو.
6- بلاش تفتح صدرك وتجعر بمبدأ معين، إلا لما يتحط تحت ايدك مبلغ يجيب اغماء، علشان ساعتها بس هتكتشف إن السرقة اسمها بنشغل الفلوس، والاختلاس اسمه حقي اللي واكلينه عليا، وربك اللي بيثبت الواحد على الحق مش ضميره.
7- كل واحد عنده عيشة وحياة والتزامات وقصص طويلة، فمش معنى إن الناس دي تعرف بعضها إنهم حالفين العهد سوا، وميفرقش بينهم غير الدم، لا عادي جدا أي حد هيلاقي مصلحة هيشبط فيها وهيبقى متخيل إن عمره ما ضر حد، بالعكس هو بس يادوب بيجري ورا رزقه، فمتاخدش الامور على صدرك، ومتتعاملش مع حد معرفة شغل إنه مراتك اللي ملهاش غيرك.
8- التواضع، والكرم، واللين، وحب الغير، والحاجات الجميلة دي اركنها على باب اي تعامل شغل، خليها للتعاملات الشخصية، لكن متتواضعش وانت بتتكلم عن شغلك، ولا تكرم حد على حساب أكل عيشك، ولا تبقى لين فالناس تستهر بيك في التعاملات العملية، ولا تحب غيرك اكتر من نفسك وتيجي على مصلحتك علشان مصلحته، الأمور الجميلة دي للأسف جوا اطار الشغل بيبقى اسمها فلان اشطر منك ولغفنك بكلمتين، يا تقعد تعمل اتفاق انت كسبان فيه بأي طريقة تنفعك، يا تدورها عمل خيري احسن وكله بثوابه.
أنا عارف إن في ناس خبرة كبيرة عني وانا جنبهم ولا حاجة، ياريت تفيدونا على الجانب العملي بخبرتكم برده.
وياريت محدش يتحمق ويدخل يقولي إن الحياة وردي وجميلة والناس في الشغل بتجيب لبعضها ورد وفول بالزيت الحار، وأنا مرة نزلت لواحد بمليون جنيه بضاعة كرم مني، قام بعتلي 2 مليون هدية في عيد ميلادي، بلاش ارجوك ?
https://www.facebook.com/Ah.Nouh/posts/10157051150298322