بالنسبة لفكرة اخلاقيات العمل وقوانين الشغل عامة
اخونا جرامشي ربنا يبشبش الطوبة اللي تحت راسه كان ليه مصطلح الcultural hegemony او الهيمنة الثقافية
واللي بيقول فيه ببساطه، ان الطبقة الحاكمة مكنش كافي بالنسبة لها مع التطور السيطرة الجسدية على العمال، فبقى مطلوب تمارس نوع آخر اكتر نجاعة في السيطرة وهو اللي سماه جرامشي هيمنة ثقافية
واللي هو ببساطه هيمنة مجموعة من الافكار اللي بتتحول مع الوقت ل”اخلاق” و “قيم” بتتحول مع الوقت لcommon sense ومسلمات عند الطبقة العاملة
القيم والمبادئ والاخلاق دي مش مفيدة غير للطبقة الحاكمة وبتساهم في زيادة سيطرتها على العمال وبتخلي العملية اسهل وبقى اصلا جزء من التربية والتعليم في المدارس عشان اعادة انتاج الافكار دي للتأكيد على سيطرة نفس الطبقة للابد.
حاجات معتوهة بقى زي الwork ethics وزي ربط قيمتك الشخصية بالانتاجية وبالانجازات في الشغل
وزي اعلاء قيم الكد والتعب وان الموظف اللي بيمشي بدري دا علق مش شايف شغله والموظف اللي طلعان عينه في الشغل وقاعد بايت في المكتب دا “مجتهد وشاطر”
وان الشطارة اصلا مربوطة بكم الجهد المبذول وافكار غبية تانية كتير بشوفها طول الوقت في الناس حواليا وفي جروبات الشغل اللي بلاقي ناس بتصعب عليا فشخ بتتسائل اسئلة زي “هو عادي واخلاقي اني اسيب شغل لسه رايحه جديد عشان جالي شغل بفلوس احسن؟” او التويتة اللي كانت منتشرة من فترة عن صاحب العمل الحزين ان بنت استغلته عشان تاخد اوفر تروح تتفاوض بيه في شركتها على مرتب اعلى انها انسان لا اخلاقي كده
يحضرني مرة كنت شغال في شركة كده، في الشيفت، وقاعدة قدامي بنت صديقة البنت عندها دور برد وبتموت والله، ومديرها قاعد زي النطع جنبها عامل من بنها
بقولها يا ماما ما تطلعي للدكتور بتاع الشركة يديك مرضي وروحي انتي عيانة وحالتك بالبلا
بتقولي واسيب الشيفت لمين؟ والشغل فيه ضغط ولو مشيت بقية التيم هيتبهدل
كانت مستغربة اوي وانا بقولها وانتي مال اهلك هي شركة امك؟ والراجل اللي قاعد جنبك دا (وهو بدأ يجز على سنانه وقافش مني) مديرك وبيقبض فلوس اكتر منك عشان لما دا يحصل دي تبقى مشكلته مش مشكلتك انتي عيانة خدي مرضي وروحي هو دوره يتصرف بقى مش قصتك دي
وقعدت شوية على ما اقنعتها تروح ومديرها بقى مش طايقني
حاجة صعبة اوي والله اني بشوف ناس لحد دلوقتي بتتعامل مع الشغل والشركات بقيم ومبادئ خيالية، يا بابا دي منظومة رأسمالية مصنوعة للسيطرة عليك وبتعاملك بالارقام، انت مجرد رقم، انت مجرد انتاجية محددة بالنسبة لهم، متتعاملش معاهم بالاداء دا دول مش ولاد خالتك، عاملهم بالارقام
مديري مرة كان متضايق اوي اني بسيب الشيفت في وسط الكول وبديها للي جنبي عشان الساعة جت 7 وشيفتي خلص وبيقولي كمل شغلك للاخر ومحسسني اني مهمل
قلت له يا حاج انا لو جيت ربع ساعة متأخر مش انت بتقفش؟ يبقى ليه عايزني اقعد ربع ساعة زيادة؟
الناس يا عيني من كتر ما اتعودت على الهطل دا وانها تاخد على قفاها بقى يبصولي ان انا اللي موظف علق ومهمل ومش بتاع شغل
لمجرد اني بتعامل بالورقة والقلم وحقي وحقك وكله بالارقام، واتقال عليا مادي عشان بقفش لما بيتطلب مني اقعد زيادة او اعمل شغل زيادة وبرفض اني اعمل دا ببلاش
اتعلموا حقوقكم يا جماعة وكفاية عبط وبص على مصلحتك قبل مصلحة الشركة