في مشكلة بتواجه أي حد بيحاول يقدم محتوى مُفيد وحابب يوصله لأكبر عدد من الناس .. وهي إن كتيرمن الناس حالياً محتاجين يتعاملوا معاملة الأطفال! لأنهم بيزهقوا بسرعة ومحتاجين اللي يلاعبهم ويضحكهم طول الوقت عشان ما يزهقوش! .. عشان يفتح بقه وياكل لازم تجري وراه وتقوله الطيارة رايحه فييين؟! .. هاااام!
ما تكتبش مقالات طويلة .. الناس نفسها قصير وبتزهق .. متعملش فيديوهات طويلة .. هزر كتير وحط مقاطع أفلام مضحكة في النص عشان المشاهد مايزهقش!
صحيح ده هيوسع دايرة الإنتشار لأن زي ماقولنا كتير من الناس محتاجة معاملة الأطفال دي عشان تصبر عالمحتوى النافع .. بس هل ده مُفيد عالمدى الطويل؟! .. هو احنا كده مش بنثبت فيهم الطبع السيء ده أكتر؟!
أنا بالتأكيد مع التبسيط .. ومع محاولة شد انتباه المتلقي .. بس “بحدود” .. لأن الأمر وصل لمستويات بايخة قوي! .. بقينا نشوف مشايخ ودعاة بيقلدوا ممثلين الكوميديا وبيستخدموا قفشات الأفلام في الدعوة! #كده_كتير
بقينا نشوف ناس بتستخدم أساليب “رخيصة” زي العناوين المُضللة والصور السخيفة لجذب الناس للمحتوى “المُفيد” بتاعهم!
تحصيل العلم والفايدة محتاج قدر من المثابرة .. ده مش هيتغير .. فلازم نساعد الناس برفع قدرتهم عالمثابرة مش تدريبهم أكتر على حالة التشتت وضعف التركيز اللي وصلولها بسبب المحتوى الترفيهي المنتشر عالسوشيال ميديا.
https://www.facebook.com/Ali.Muhammad.Alii/posts/10155385803880735