عن عمرت خيرت ..عن تعليم الشغف

شخصيا اول مرة احضر لايف لعمر خيرت ..فعلا بتسمتع بكل حاجة بيعملها
علي الرغم من ان المزيكا اللي بيعزفها موجودة أونلاين ..بس فعلا انك تشوفها قدامك احساس تاني خالص ، لأنك هاتشوف حاجات مش هاتستمتع بيها أونلاين
– هاتشوف انسجام غير طبيعي بين فريق واحد بيعزف اكنهم فرد واحد
– هاتشوف فريق بتكوين غريب بيجمع مختلف الفئات العمرية
– هتلاحظ ان الفريق كله بيستمتع بكل حاجة بيعملوها ..كل الفريق بيعزف وهو مبسوط ومبتسم ودماغه وجسمه كله بيتحرك وبيهتز علي الأنغام اللي بيعزفوها علي الرغم من انهم عزفوها كتييييير جدا
– لما سألت أصحابي لقيتهم عارفين اغلب الناس اللي معاه بالاسم ..مش مجرد ان حد بيحضر لعمر خيرت وخلاص ..الناس اللي معاه كلهم معروفين
– عمر خيرت قدم عازف جديد “في فريقه النهاردة” ..طلعه قدام المسرح في الاول خالص ..الضوء الأبيض سلط علي العازف ده بس وبقي ضوء خافت بسيط جدا علي الفرقة كلها في الخلفية بما فيها عمر خيرت نفسه
– عمر حياه كتيير بعد الاغنية
– مع بداية اغلب الأغاني ” اللي اغلب الحضور حافظها من اول مقطع فيها.. الناس بتسقف
– في أغاني الناس بتسقف طوال الاغنية كلها
– بعد كل أغنية الناس بتسقف للفرقة اكنهم اول مرة بيسمعوا الاغنية
– عمر خيرت بيقوم ويرد التحية للناس كل مرة
– في أغاني بيبقي فيها اجزاء Solo “شخص بيعزف جزء لوحده” ..عمر خيرت اخر الاغنية بيشاور عليه علشان يقف وهو بيسقلفه مع الجمهور
– ترتيب الأغاني بيخلي الجزء ال Solo كل مرة مع حد في مكان مختلف
– اكتر من مرة “في الجزء ال Solo” تلاقي افراد الفريق بيسقفوا مع الجمهور للشخص اللي كان بيعزف “بمجرد انتهاء مقطعه” وقبل انتهاء الاغنية
– عمر خيرت وقف العزف وشكرا الفريق اللي معاه كلهم “واحد واحد باسمه” .. والكلام ده كان في نص الحفلة مش في الاخر
– علي اخر الحفلة مكنش فيه حد في الفريق معزفش جزء Solo وعمر شاورله وسقفله مع الجمهور
-الناس كانت مستمتعة بالأغاني لدرجة انهم كانوا بيطلبوا منه يعيد عزفها ❤️❤️
– عمر سرع رتم العزف اكتر من مرة ..والنَّاس كانت بتسقف بنفس السرعة اللي بيعزف بيها
عمر خيرت مش بس يعمل اللي بيحبه بشغف وبيستمتع بيه وبيمتع الناس بيه .. دا كمان بينقل الموضوع لكل أفراد فريقه

شكرًا لكل واحد بيعمل الجزء اللي بيحبه وبشغف
شكرًا لكل شخص بينقل وبيوصل خبرته للناس
شكرًا لكل شخص قادر يبدع في مجاله ويمتع غيره
شكرًا عمر خيرت