عن انتشار موضوع كوباية شاي و قطع فراخ
– في حاجة اسمها Viral ودي اي “حاجة” بتنتشر مثلا علي الـ Social Media وناس كتييير تتكلم عنها.
– الميديا والشركات بشكل عام مبيفرقش معاها “الهدف” من الحاجة دي ايه…طالما انتشرت بيجبوها وبيظهروها ويتكلموا عنها بشكل اكثر ويستخدموها في اعلاناتهم بحيث يستفادوا منها انها تزود مشاهداتهم وانتشارهم
فحضرتك لما بتعمل شير للكلام/الموضوع/الفيديو اللي مش عاجبك سواء بتتريق عليه او بتشتمه…حضرتك بتزود انتشاره…
والله العظيم بتزود انتشاره وبتفيده…
يعني مثلا لو اخدنا اخر “trend” في مصر الناس كانت بتتكلم عليه وهو موضوع كوباية الشاي “انا بقصد هنا الموضوع والطريقة انتشاره بغض النظر عن الشخص/ الموضوع”
حضرتك لما “نشرت البوست و شتمت/اتريقت” الموضوع انتشر..وصاحبة البوست ناس كتيير ابتدت تتابعها، اذاعت صوت العرب سجلت معاها، الـ BBC عملت معاها حوار، جريدة العين الامارتية عملت معاها حوار، وبرنامج العاشرة مساء كلموها تسجل معاهم …والموضوع وصل لدرجة انها زهقت وقررت متسجلش مع ميديا تاني 
????
لو بصينا للموضوع من ناحية تانية هتلاقي مثلا case حصلت مع شاب امريكي عادي عنده ١٦ سنة كتب تويتة لمطعم الفراخ اللي بيحبه وقالهم محتاج كام ريتويت علشان اكل من عندكم لمدة سنة ببلاش، اللي مسؤل عن حساب المطعم “كان بيهزر” ورد عليه وقاله انك محتاج ١٨ مليون “مع العلم ان الـ World record كانت تويتة الإعلامية الشهيرة Ellen DeGeneres صاحبة برنامج The Ellen Show بـ 3.2 مليون ريتويت …الواد قالهم تمام وكتب تويتة انه محتاج الناس تعمله ريتويت علشان ياخد الاكل ببلاش، التويتة انتشرت بشكل Viral وناس وشركات كتييرة اتفاعلت معاه زي مايكروسوفت وجوجل وامازون و صحيفة USA Today والواد اتشهر جدا جدا وبقت كل الناس بتتكلم عنه
ممكن تقرا عن الـ case دي بالتفصيل من هنا: http://bit.ly/2pge62m
https://twitter.com/Twitter/status/854416760933556224
انتشار الموضوع ده خلي شاب سعودي بعدها بكام يوم “حب ينفذ نفس الفكرة بهدف تاني فدخل و كتب تويتة لمطعم شاورما في السعودية قالهم محتاجين كام ريتويت علشان تدونا 100 ساندوتش نوزعها على عمال النظافة في الشارع ؟
فجأة كده وبدون اي مقدمات جمعية خيرية ردت علي التويتة دي “واللي مش متوجالهم اصلا” وقالته واحنا مستعدين نكون مظله رسميه ونوزع المنتجات على ١٠٠ عامل نظافة…بعدها راح مطعم بيتزا “برضه ملوش علاقة بالتويتة” دخل وكتب: نبي نشاركك الأجر! ونوزع ١٠٠ بيتزا معاك…وبعدها الموضوع زاط علي الاخر ودخلت معاهم شركة مياه كتبتلهم “الشاورما والبيتزا تعطش والجو حار! مويتكم علينا وبالكمية اللي تحتاجونها” وبعدها شركة تصوير قالتهم تصوير وتوثيق الموضوع علينا ومحل الشاورما قاله من غير ريتويت هانديك ١٠٠ ساندوتش و Careem السعودية دخلت وقالت التوصيل علينا واتصالات السعودية قالت اننا هانوزع ١٠٠ كارت شحن وبعدها بقي اغلب الشركات السعودية اتفاعلت مع الحوار وكل واحد بقي يدي ١٠٠ “اي حاجة” من اللي عنده
https://twitter.com/Mr_Abdul3ziz/status/852864147553308672
https://www.facebook.com/Khyer.Ehsan/posts/1645372522147291?pnref=story
كل الشركات دي دخلت في الموضوع بسبب انتشار موضوع الواد الامريكي .. “مليش علاقة بنية الشركة تعمل خير او لا”… اللي اقصده ان انتشار قصة الواد الامريكي خلاهم من نفسهم يتفاعلوا مع حاجة مشابها ليهم بتحصل في بلدهم ومن نفسهم من غير ما يتطلب منهم.
فلو انت شايف حاجة مش عجباك ومش عايزها تنتشر ممكن تعمل report للحاجة دي ..او ممكن تتجاهلها خالص… او علي الاقل اتكلم عليها بشكل غير مباشر..لكن فكرة انك بتنشرها دا بيخدمها مش بيضرها.