عدد لا نهائي من المواقع تحتوي علي تايملاين لا ينتهي من الصور
صور الناس الاحلي منك
صور الناس الاسعد منك
صور ناس اكثر منك ثقة بانفسهم
ناجحين في شغلهم اكثر منك
بيكسبوا من اعمالهم اكثر منك
بيخرجوا اكثر منك
بيفرحوا اكثر منك
بيتفسحوا اكثر منك
بيسافروا اكثر منك
حواليهم ناس قريبين منهم اكثر منك
بيشتغلوا اكثر منك
بيذاكروا اكثر منك
بياخدوا شهادات اكثر منك
بيحبوا شغلهم اكثر منك
بيستمتعوا بشغلهم اكثر منك
بيسكنوا في مناطق اغلي منك
بيزوروا قرايبهم اكثر منك
بيرقصوا في الافراح اكثر منك
بيحبوا شركاء حياتهم اكثر منك
في نفس التوقيت اللي كل العوامل التانية اللي في شارع بتوصلك رسالة انك ممكن تسكن فين…وتتفسح فين…وتعيش جنب مين…وتاكل فين ومع مين
كل العوامل بتقولك وبتركز علي انت “المفروض” تبقي فين وشكلك يبقي عامل ازاي ومع مين
ومفيش حد بيتكلم عنك حاليا ولا علي الناس اللي شبهك و زيك وحواليك..وبمرور الوقت؛ تجميعة العوامل المثالية واضافة الضغوط اليومية وسعيك للتخلص من الضغوط و محاولة تحقيق المثالية بتخيل ما قد يكون…بيضعفك نفسيا جدا
تكرار الضعف النفسي، بيكون الضربات المتتالية لنسبة الدوبامين والسعادة اللي ممكن تحققها لنفسك وبنفسك
وبتفضل تقل تدريجيا اثناء سعيك لتحقيق معادلة
“غير موجودة غير في خيالك”
وبيوصلك للضعف الجسدي وتصبح فعلا مش قادر.
كلنا تحت سيطره مجتمع وناس وعيب وعادات وتقاليد عملها ناس ماتوا وسابونا نقع في البلاعه بتاعتهم ..
تحت سيطره تفسير مسمي “العلاقات” بشكل غلط ..
تفسير غلط لدرجه ممكن تخلق رغبه في الوحده لانها بتكون حاله اكثر سلاما مع النفس ومع الناس للاسف ..
في الاخر احنا بشر و طاقاتنا محدودة ..
بنحتاج مجاهدة و ترويض و مقاومة الافكار و المشاعر الضعيفة عشان نقدر نكون طيبين
وحل الصراع بين ما هو منطقي و عادل و ما بين اللي اتربينا عليه من ثقافة محيطة بتقاليد متعفنة ملهاش اي منطق او فايدة غير فرش سجادة حلوة منغير ما يتنضف تحتها….
هوا الحريه..انت ممكن تشعر بالحريه وانت لوحدك وده بيبقي انجاز .. لكن لما هاتشعر بحريتك وسط الناس بيبقي انتصار ..
وعلشان يحصل الانتصار ده، الامر مايخلاش انه هايكون صادم للناس وهايتهموه بالجنون بس الحريه تستحق
فقط أعد ضبط عقارب ساعتك..واستعد لتغيير قياسات (الزمكان) وأبعاده.. وابدأ رحلة البحث..
الاحلام مش ببلاش
الثمن يا تختار تبقي قد حلمك وتواجه الاحباط من اهلك واصحابك ..
يا تبيعه وتاخد :”مرتب ثابت
+ اقتناع اهلك واصحابك بيك لحد سن معين وبعدها كلكوا هاتتأقلموا مع المرض اللي انتوا فيه + (فرص) في الترقية”
مفيش ين البنين ..اختار وحاسب علي ثمن اختيارك
رفعت الأقلام..وجفت الصحف