المعروف للجميع ان مع مرور كل حقبة زمنية بتمر ويظهر فيها جيل جديد، المجتمع نفسه ومفاهيمه بتتكيف و بتتغير على شكل الجيل ده، وده طبيعي في كل المجتمعات سواء هنا او في ابعد بلاد الله في التلج والصحراء وحتى جوا الغابات.
“علم الاجتماع” بيفسر ان التغير في حجم وشكل المجتمع مع مرور الوقت وطبقا للظروف المحيطة وكل حاجة بتتطور حواليك، دايما مصحوب بتغير في المفاهيم وأساليب الحياة الجديدة نفسها، وعشان المجتمع يتكيّف مع التغيرات دي ويحافظ في نفس الوقت على التوازن والاستقرار، فا طبيعي أن شخصية الإنسان نفسها تتغير هي كمان، خصوصا مع كل جيل بيظهر ويظهر معاه استقلاليته عن الجيل القديم اكتر واكتر.
ومن هنا بيطلعلنا مفهوم جديد ..اسمه “صراع الاجيال”..
صراع الاجيال ده هو صراع ايديولوجي ثقافي بيحصل دايما كل ما جيل جديد من الاطفال بيكبر ويبقا شباب، وجيل قديم من الشباب بيبدأ يخش مرحلة النضوج، صراع ثقافي واجتماعي بين جيل قديم “راديكالي ومحافظ” وجيل جديد يدعو إلى “الحداثة والمعاصرة”.
دا امر طبيعي وبيحصل عادي مع كل حقبة زمنية بتمر عالبشر في اي مجتمع في العالم كله، وفي كل حقبة تاريخية، هتلاقي دايما الصراع النفوذي ده شغال بين جيل قديم شايف ان جيله كان هو الصح والاكثر فهما والاكثر حكمة، وجيل جديد شايفينه فرافير متسرعين مبيفهموش، بس خلينا نتفق ان الجيل الجديد دايما هو اللي بيكسب، لان ببساطة دي الحقبة بتاعته هوا وزمنه هوا وهوا اللي بيفرض القوانين دي على نفسه وبيعيشها بردو بنفسه.
مع الوقت، الجيل الجديد ده هيتحول ويبقا هو الجيل القديم الراديكالي، وهييجي بعده جيل جديد، يبدأ الصراع، وتنحاز الدفّة بردو للجداد، وهكذا، دي سنة الحياة، التغير والتجديد.
على سبيل المثال، في فترة من الفترات، عبد الحليم حافظ كان بالنسبة لقدماء المستمعين هو شاب فرفور بوظ الاغنية العربية، وقبله ام كلثوم اتهموها بنفس التهم دي بالظبط، حتى في مجال الادب فا لك ان تقرأ عن آراء الجيل السابق لنجيب محفوظ والسباعي فيهم، حتى عمرو دياب لما ظهر، شوف رأي عبد الوهاب فيه او نقاد فترته، وهكذا .
لازم نؤمن ان ايقاع الحياة دايما بيختلف مع مرور الوقت، وكل جيل بيتولد بيستقل بذوقه حتى لو الجيل القديم واجبه انه يورّث عاداته وتقاليده وحكمته للجيل الجديد، لكن مع ايمان تام بأن الحياة بتتغير، والاذواق نفسها بتتطور واللي عاجب اخوك الصغير عمره ما هيعجبك ولا هتفهمه، والخلاف اللي بيحصل هنا هو خلاف طبيعي ضمن سياق التطور الاجتماعي يعني مرحلة معروفة مش وليدة جيلنا نفسه او حاجة جديدة بنعيشها، لا دا صراع موجود من اول يوم اتوجد فيه البشر على كوكب الارض.
– سقراط بيقول : لا تكرهوا أولادكم على آثاركم ، فإنهم مخلوقون لزمان غير زمانكم
اللي حاصل دلوقتي بشكل عام على الترابرز والراب سين، وبشكل خاص على اغنية ويجز الجديدة “البخت”، هو جزء كبير من الصراع المجتمعي المعروف ده، مابين جيل قديم تحول تدريجيا لراديكالي بس لسة مقتنع بحداثته وذوقه اللي عايز يفرضه عاللي بعده من مبدأ “التوريث”، وجيل جديد منفصل تدريجيا عن القديم اللي زينا مؤمن بالحداثة وده ذوقه الموسيقي الجديد، مابين الجيلين فجوة كبيرة بتوسع مع الوقت، بينفصل فيها الجيلين تدريجيا لحد ما يستقل الجيل الجديد برأيه ويفرضه على مجتمعه لانه هو في النهاية بردو اللي هيعيشه مش حد غيره.
فا كونك دلوقتي بتحكم بالمقارنة بين ذوقك المبني على خبرات سابقة مع مطربين جيلك بلونهم اللي عايشتهم وسمعتلهم، وبين جيل جديد ليه لون حداثي مختلف تماما في كل شيء حتى في اختيار الكلمات والالحان، فا ده مقبول انك تشوف ان اغنية “البخت” اغنية غير مفهومة او غريبة على مسامعك، المنطق بيقول كدة وماضيك هيقول كدة.
لكن لو هتخلي حكمك ده يكون مقياس الزامي على اللون كله بالجيل كله من باب “احنا بنفهم عنهم وبيسمعوا ازاي القرف ده” من غير ما تحترم ميولهم للحداثة طبقا لمتغيرات كل عصر، وتبدأ تتهم الجيل كله بأغانيه انهم مبيفهموش وان ده اسمه عك في حين ان الاغنية نفسها لاقت نجاح كبير بينهم، فا ده ان دل فيدل على ٣ حاجات :
– انك كبرت ودخلت في فريق الراديكالية المحافظة خلاص .
– انك كمان مش عارف تجاري التطور وهتبدأ تنفصل واحدة واحدة عن المجتمع .
– ان الفجوة وسعت بالفعل وبقينا جيل غريب عجوز عن الشباب اللي اصغر مننا لا احنا فاهمينه ولا هما فاهمين مننا حاجة.
طيب، طالما مفيش فعلا “اسفاف” ظاهر وملموس او امور تخدش مجتمع او حياء او خلافه ..
يبقا بكل بساطة الدنيا، مش فاهم الكلمات والايقاع الجديد اللي هوا مستهدف وموجه لجيل اصغر منك اصلا، فاهمين آلياته ولغته ومصطلحاته وعايشين فيها صبح وليل، قدامك خيارين، يا نحاول نفهم ونفتح طريق للاتصال بين الجيلين عشان الفجوة متوسعش والمجتمع يتفكك، يا اما عالاقل تعلن نقدك ورفضك للون ده اللي مش جي على هواك من سبيل “الارشاد” لكن مع تقديم احترام للجيل اللي بيسمعه وبيحبه، من غير ما تنتقد الجيل نفسه ولا تحاول منعه، او تحاول تفرض ذوقك عليه بالقوة.
حد فاهم حاجة؟