هذا البوست مش كروي – بل بوست اداري و خوازيقي يلمسه الكثيرين 
😉
موضوع ان شيكابالا طلع بياخد ربع مليون جنيه يعني 12 الف دولار في السنة ..في نفس السنة اللي الزمالك دفع 8 اضعاف المبلغ ده للاعب اسمه احمد حسن مكي ولاعب اجنبي اسمه ستانلي اخد 16 ضعف عقد شيكابالا .. تخيل !؟ الموضوع ده اكبر من شيكابالا الشخص لشيكابالا الفكرة , كل شركة هتلاقي فيها شيكابالا , الموظف ابن الشركة اللي دخل الشركة عيل صغير معدم ( زي ما شيكابالا دخل الزمالك كده ) هيفضل كده في عيون مديره حتى لو عدى اربعين سنة , هيفضل شيكابالا العيل الصغير اللي على قد ايدينا , ابن الشركة اللي بيرضى بقليله و بنجيب فوقيه موظفين من بره الشركة اقل منه بكتير و ياخدوا اضعاف اللي بيقبضه و يا سلام بقى لو جابوا ستانلي – الموظف الاجنبي اللي بيتكلم انجليزي لبلب و بس .. وبس خالص .. طبعا عشرين ضعف مرتب الموظف الشيكابالا اللي هو اشطر و امهر و انشط , الموظف الشيكابالا ممكن يشيل الشركة شيل على كتافه و هو ساكت , بيشوف الموظف المكي و الستانلي مانتخين او مش فاهمين و بيمشوا و ييجو غيرهم و كله بيكبر عليه و هو ساكت , اي بلوة بتحصل في الشركة هو المسئول , اي تقاعص في قسم هو المسئول, لو خلص الشاي من البوفيه و الكلينكس من الحمامات برضه هو المسئول و من وقت للتاني بينفجر بقى و يتقمص و يقدم استقالته و يمشي , اخره يقعد كام يوم في البيت و هوب مديره يتصل بيه و يعد معاه و يثبته , و يعمله مرتب خرافي يتمنظر بيه قدام الموظفين .. بس ميقبضوش .. الشركة دايما هتبقى مزنوقة و انت ابن الشركة اللي لازم تستحملها خد جزء من مرتب و الباقي ربنا يسهل ( شيكابالا اللاعب اتعمله عقد 8 مليون في السنة مقبضش منهم الا 900 الف و اتنازل عن الباقي علشان هو ابن الشركة .. قصدي النادي 
😀 ) هيمشي تاني و يتقمص تان و هريجع تاني و هيتثبت برضه بكل سهولة لان الموظف الشيكابالا بيحب الشركة و مش لاقي نفسه في اي مكان برة الكومفرت زون اللي لقى نفسه فيها , الشركة دي مكانه و بيته و بيفشل براه و في نفس الوقت المدير بيلعب على الوتر ده انه مش هيقدر يمشي و لو مشي بيفشل و هو اللي شايل الشركة و برضه ده شيكابالا يعني ابننا الصغير هيقبض كام يعني ! هو شايل الشركة اه و اشطر من اي حد بنجيبه سواء مصري و لا اجنبي بس ده ابن الشركة يعني ده شيكابالا .. اخره ايه يعني هيتقمص كل فين و فين .. هنجيبه و نثبته … لو انت شيكابالا في شركتك .. اهرب يا ولد .. اهرب قبل ما تبقى الشركة الكومفرت زون بتاعتك و تتبهدل