ربنا مش

ربنا مش ناظر مدرسه، ولا شيخ كبير، ولا شخص مثقف محتاجين نتكلم معاه باسلوب معين، ولا شخص سطحي هيقفش لو اتكلمت معاه باسلوب بسيط

ومش كمبيوتر تكتبله كود معين عشان الدعوه تستجاب

ومش مدرس الفصل الرخم الي هيغضب عليك لو كلمته باسلوب الصحوبيه

ربنا مش بيتعمله انترفيو قبل ما تدعيله او تخاطبه..مش هيقيس انت في انهي طبقه عشان تتقبل في المدرسه بتاعته فتدعيه بالاسلوب الصحيح

ربنا مش HR لو سمع منك كلام غلط عن المطلوب او اسلوب مخالف للاسلوب الصحيح هيرفضك او هيrejectاك

ربنا في دعوته مفيش “مطلوب”

ربنا مش قفوش زي البشر الي لو عملت معاهم موقف وحش وجيت تقصده في خدمه مش هيعملهالك عشان شايل منك

ربنا مش بتاع المسلمين بس

ربنا الي رسمتوه في دماغكم، ده مش ربنا..دي اهاليكم ومجتمعكم ومدرستكم هما الي كانوا بيستخدموا ربنا في تربيتكم

“خلص اكلك عشان ربنا يحبك” “اعمل الواجب لحسن ربنا يزعل منك” “اسمع كلام بابا عشان ربنا ميدخلكش النار” “البس دي عشان ربنا ميضايقش منك”
“انزل هات نعناع عشان ربنا يتبسط منك”

الرفاهيه الفقهية هي الي ارتقت ان من جلال الله، التأدب مع الله بالاسلوب الادبي الراقي في مخاطبة الله، كما انك تتأدب مع البشر او ذوي المناصب

لكن ربنا مش ذو منصب

ربنا لا يخضع لقوانين البشر الي على اساسها عملتوا اساليب التواصل معاها

ربنا قال ” وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ ”

مقالش تدعي ازاي ولا قال انه في اسلوب معين تدعيه بيه.

حتى لما قال يستجيبوا لي وليؤمني بي كان بيقولها عشان الي يعمل كده يتم ارشاده لما فيه نفع فيه هو..مش لربنا.

وبعدين لما بيكون في حد انت فاهم حالته كويس ومعاشره وعارف ايه الي جواه، وجيه قال كلمه غلط ليك قدام ناس معينه، وتلاقي الناس المعينه دي اتضايقت، فانت لا اراديا بتقول “سيبهولي بس انا فاهم هو قصده ايه وهو ميقصدش الي قاله”

فمتجوش انتوا تدخلوا بين الغلابه وربهم.

يا تعلموهم يا تسيبوهم في حالهم

https://www.facebook.com/iHesham/posts/10159968336035335