خوارزميات الفيسبوك بتزود التعصب عند الناس

خوارزميات الفيسبوك بتزود التعصب عند الناس
سواء في الرياضة او السياسة او الدين او الخناقات بين الذكوريين والفيمنيست او اي شيء عموماً ..

الفيسبوك متبرمج انه يوريك اللي انت بتحبه اللي انت بتتفاعل معاه اكتر اللي يخليك اطول وقت موجود ع الموقع ..
وعشان بقى في ناس كتير وصفحات كتير جدا ع الفيسبوك وكل واحدة بتنشر كذا بوست في اليوم فهو مضطر يفلترلك البوستات اللي بتظهرلك بحيث يوريلك اللي انت بتتفاعل معاه وبتحبه اكتر ..

النظام ده بيخليك مع الوقت مش بتشوف غير البوستات اللي ليها نفس توجهاتك ومش بتسمع غير الاراء اللي على مزاجك ومن نفس معسكرك..
مع الاستمرار في ده
انت مش هتشوف غير الكلام اللي بيهاجم الناس اللي انت مختلف معاهم وبيتصيدلهم أخطائهم وذلاتهم ويعممها ويقعد يضحكك عليها ويعمل كوميكس على اشاعات اصلا- انت مش هتعرف انها اشاعات – ويجيب اراء شاذة عندهم ويعتبرها الاصل

وانت هيبقى عندك انطباع ذهني ان كلهم بيقولوا كده ويرد على كلام بيقولك انهم قالوه – انت مسمعتوش او سمعته مقتطع من سياقه – ردود ممكن تكون اصلا غير دقيقة – بس انت مش هتاخد بالك انها غير دقيقة عشان مش هتحط نفسك مكان الطرف التاني – وتشوف ردهم ممكن يكون ازاي – ..لحد ما هتبقى شايفهم كلهم ناس اغبيا وجهلة ومتخلفين وعالم غريبة وغريبة جداً كمان ..

لو جربت وطلعت لفوق وشوفت الصورة الكلية هتلاقي شوية جزر منعزلة كل واحدة منهم سكانها شايفين التانيين بنفس النظرة اللي عندك دي بالظبط ..

ولو جربت ودخلت جزيرة منهم هتلاقي حاجات من اللي بتسمعها عندك هي اصلا محصلتش .. وحاجات عليها ردود مقنعة .. وناس كويسة جدا اللي عندك اخدوا موقف او اتنين ليهم وشوهوهم في عينيك او مطلعوش بنفس الصورة السيئة اللي انت واخدها عنهم مجرد بشر وليهم بعض الذلات ..

وافكار كان متهيألك ان كل سكان الجزيرة التانية بيقولوا بيها كل ما تقابل واحد تلاقيه مختلف جدا معاها ومش مقتنع بيها ..
وناس حلوة جدا في معسكرك اهل الجزيرة بيكرهوهم منتاش عارف ليه .. واعتقادات غريبة في اذهانهم عن سكان جزيرتك وعاداتهم وحياتهم انت عمرك ما اكلت اطفال قبل كده ولا شوفت حد بيعمل كده وهم فاكرينكم كلكم بتاكلوا اطفال وبتعذبوا عصافير الكناريا البريئة بالحرمان من الطعام حتى الموت ارضاءً لساديتكم الكريهة البغيضة ..

العالم بقى غريب والدايرة دي عمالة بتزيد كل يوم

المصدر