فيه ناس منتهى أملها “تتوظف” وتقعد على مكتب لغاية ما تطلع معاش بعد 40 سنة بيعملوا نفس الحاجة كل يوم. الحلم ده من وجهة نظري صلاحيته انتهت بمطلع الألفية الثالثة.
ضروري تلاقي شغل طبعا ويبقى لك دخل ثابت. لكن غير منطقي في زماننا ده إنك تتخيل إن الوظيفة التقليدية هي الحل الوحيد للحصول على الرزق الحلال. الناجحين والأغنياء في زماننا ده مش موظفين. إنما ناس عندهم مهارات أو أفكار متميزة، فصلوها على الحاجات اللي بيعرفوا يعملوها وبيحبوا يعملوها، وتطوروا فيها لغاية ما قدروا يدفعوا الناس فلوس علشان يحصلوا عليها منهم.
ستيف جوبز خلانا كلنا عايزين نشتري آيفون. بعد ما كنا مبسوطين بالنوكيا أبو كشاف smile emoticon
لما جوجل طلع كمحرك بحث الناس اتريقت عليه وقالوا دول شوية شباب مجانين، أكيد مش هينافسوا ياهو (اللي كان أكبر وأشهر محرك بحث وقتها وشركة كبيرة قيمتها ملايين) امبارح ياهو اتعرض للبيع أخيرا بعد طول إنكار لفشله قدام جوجل!
مارك زوكربيرج خلانا كلنا نتوقع إن أي إنسان نعرفه أكيد عنده حساب على “الفيس”
مرسيدس ده إسم بنت المهندس اللي صمم العربية اللي كل الناس بتحلم بالحصول عليها كرمز للمستوى الاجتماعي. قبل ما يصممها كان فيه عربيات تانية كتير محدش فاكرها دلوقتي
نوتيلا اللي ابتكرها كان عايش في وقت الشوكولاته فيه شاحة علشان الحرب العالمية ومش عايز يبطل شغل ويقفل علشان فيه أزمة في المكونات، ففكر يخلطها بعجينة بندق علشان يزود حجمها
من 10 سنين مكانش حد يعرف تويتر ولا واتساب ولا سناب تشات ولا دابسماش، كل مؤسسينهم شباب كان ممكن يشتغلوا مهندسين برمجة في مايكروسوفت أو أوراكل بمرتب كويس، ويفضلوا طول عمرهم أقصى أحلامهم يترقوا smile emoticon
كل مصممين الأزياء والعطور والمجوهرات في العالم مش موظفين
كل الشيفات المشاهير والرياضيين والفنانين والمصممين المحترفين والكتاب والروائيين الناجحين مش موظفين
اللي بيغيروا العالم وبيبقوا مليارديرات في وقتنا ده مش موظفين!
لو مش لاقي شغل وعندك إحباط وحياتك كئيبة، جايز يكون ربنا مضيق عليك الباب ده علشان انت عندك قدرات ومهارات دفينة، لو اكتشفتها وطورتها ممكن تفتح لنفسك باب رزق أكبر منه بعشرات المرات. اقعد مع نفسك واكتشف انت تقدر تعمل إيه بجد، مش المجتمع مستني منك إيه. وبعدين ابدأ طور مهاراتك اللي تخليك تبدأ تحاول في السكة اللي انت نفسك فيها.
في الوقت الحالي، في الظروف الصعبة اللي احنا فيها دي، الكلام ده ممكن يبان إنه مستحيل التحقيق. لكن في نفس الوقت، بالذات في الأوقات الصعبة، اللي هايفضل واقف في مكانه مستني النجدة تهبط عليه هايغرق أول واحد. واللي بينجح في الوقت الصعب، بينطلق في الوقت الكويس لإنه بيكتسب خبرات جامدة من المعافرة في الوقت الصعب.
متقولش تعليمي حكومي، أحسن تعليم في العالم في وقتنا الحالي هو التعليم الذاتي، والتجربة العملية. الشهادة مفيدة بس للي مستني يتوظف بيها، لكن فيه طرق كتير للحصول على نفس المعلومات وتوظيفها في ابتكار مجال خاص بيك محدش بينافسك فيه. كل الجامعات الشهيرة في العالم عندها برامج تعليم مجانية عبر الإنترنت، واللي عايز حاجة بيتعب ويسعى لها ويحصل عليها، مبيستناهاش تيجي لغاية عنده.
حتى في الاقتصاد الدولي: الدول اللي عندها منتجات قوية بتبيعها بتبقى غنية وبتعدي الأوقات الصعبة، والدول المستهلكة فقط بتبقى غير مستقرة وبتفضل دايما تحت رحمة المنتجين.
لينك البوست اللي في أول تعليق في التعليقات بتاعته مصادر كتير جدا للتعليم المجاني لكافة المهارات عبر الإنترنت، بما فيها اللغات والبرمجة والفنون وحاجات تانية كتير.
أحسن وقت إنك تبدأ كان امبارح. أحسن وقت بعد كده هو دلوقتي حالا!
https://www.facebook.com/sahar.elnadi/posts/10156494482540394