التصنيفات
مقالات الضيوف

حقيقة قصة “أوزيل” ونادي ارسنال

هل ارسنال عاقب اللاعب بسبب نشره تويتة عن مسلمي الايجور؟

بخصوص تهديد ابننا “محمد النني” بمصير “أوزيل” لما قرر يساند مسلمي “الإيgور” ضد الصين، خلينا نصحح معلومة تخص قصة “أوزيل” بما لا ينقص أبدًا من نبل مواقفه..

ايه اللي حصل؟

في ديسمبر 2019، كتب أوزيل تغريدة ينتقد فيها الصين وصمت المسملين تجاه الأحداث اللي بتحصل، وأول ما الدنيا سخنت، أرسنال على طول أوضح إنه ملوش دعوة بموقف اللاعب، وكمنظومة ملوش دعوة بالسياسة.

رد الصين بدأ بمنع عرض ماتش أرسنال التالي واللي كان ضد مانشستر سيتي، وحذف أوزيل من نسختها للعبة Pro Evolution Soccer 2020… بجانب التكذيبات المعتادة وإن اللاعب اتضحك عليه بالصور اللي شافها وإلى آخره.

هل أوزيل اتجمد في أرسنال بسبب التويتة؟

أوزيل بالفعل كان شبه متجمد في أرسنال بعد خلافه مع المدرب السابق أوناي إيمري، ومع إقالة إيمري وتعيين ليونبيرج مؤقتا ثم أرتيتا، بدأ أوزيل يرجع التشكيل الأساسي التاني، ودا كان امتى؟ في ديسمبر 2019 بردو، يعني بعد التويتة تقريباً.

أوزيل لم يتم تجميده بعد التويتة، ولعب أساسي في 10 ماتشات، كان مبشر في 4-2-3-1 اللي اعتمدها أرتيتا، وعلى ما أذكر كان عمل ماتش هايل قدام مانشستر يونايتد.. بس طبعًا كل دا عطل مع توقف الدوريات بسبب جائحة كورونا.

حتى موضوع عدم بث مبارايات أرسنال في الصين، لم يستمر، ورجعت الماتشات تتذاع تاني لكن بدون ذكر اسم أوزيل.

وقت التجميد الفعلي

التجميد الفعلي لأوزيل بدأ مع استئناف الدوريات، بعد رفضه تخفيض مرتبه.. مفاوضات إدارة أرسنال مع لاعبيتها استمرت 6 أسابيع(أثناء توقف ال3 شهور) وأرتيتا ضغط بنفسه عشان يقنعهم.

لكن أوزيل فضل على موقفه، وزودها كمان بالسؤال عن اللي هتعمله الإدارة بالفلوس دي، واللي ثبت بعدين إنه سؤال منطقي جدًا لأن موافقة اللاعب على خفض مرتبه، بيصب في جيب مالك النادي، ومفيش ضمانات إنه يستخدم لإبقاء موطفين النادي في وظايفهم من غير ما يتم تسريحهم.

نعيد التذكير إن دا لا يقلل أبدًا من مواقف أوزيل، لكن تسلسل الأحداث بيقول إن أرسنال مجمدش اللاعب بسبب موقفه السياسي، ولو حصل دا مع النني هيكون سابقة بالنسبة للنادي… لكن مع استمرار دعم القضية من لعيبة أكتر في إنجلترا بالذات هيقلل احتمالية حدوث دا

المصدر

Reference