التصنيفات
مقالات الضيوف

بمناسبة موضوع عبدالله السعيد

لما الفلوس تبقي حاضرة بدون حساب عشان نشتري هاني سعيد وفتح الله ومهاجم منتخب غانا الأساسي, ونرجع أيمن عبد العزيز من تركيا وميدو وعمرو زكي من أنجلترا, ساعتها يبقي اسمها منافسة وإحتراف وفريق أحلام .. بس لما حد غيرنا يعملها يبقي افساد للكرة وقتل للمنافسة وحرق لأغصان الزيتون ..

لما ممدوح بك يجدد لأي لاعب بالمبلغ اللي عايزه ويخلص شيكابالا ويمضي النادي علي هدومه, أو لما منصور البلوي يشتري لاعيبة ويطلع شيكات ويدفع مرتبات الموظفين ويعرض مكافات خيالية للفوز قبل كل ديربي, يبقي اسمه محب للنادي, بس لما المحب دة يدفع لحد غيرنا يبقي اسمه كفيل, تركي ال شيخ نفسه ممكن يبقي محب لما يجيب النقاز ويتحول في لحظة لكفيل لما يجيب صلاح محسن ..

البلطجة ومخالفة القانون والتباهي بالنفوذ والقعدة علي حجر السلطة وتخليص اللاعيبة بالأوامر العليا وقيد اللاعيبة بالعافية واحنا علينا فلوس للاعيبة تانية أسمها قوة وجدعنة وهو دة اللي ينفع في الزمن دة, بس لما نخبط في اللي أعلي مننا ونلبس في الحيط بنرفع المشاعل ونمشي في مسيرات جنائزية, و نغني كيف غفلنا الدولة في 12 دوري ..

القعدة مع السعيد في اخر 6 شهور شطارة, والقعدة مع الشناوي في نفس الفترة عيب .. التجديد لفتحي بشروطه انبطاح, والتجديد لباسم بشروطه احترافية .. التجديد لعبد الله بعد مماطلته سقوط للمبادئ, وتجميده وعرضه للبيع تاني يوم برضه سقوط للمبادئ .. لما نشتري 80 لاعب في 4 سنين دي احترافية حتي لو خلصت كل موسم فارق عن الاول 30 نقطة. ولما غيرنا يشتري احتياجاته يبقي افتراء .. جمال عبد الحميد والتوأم اللي عاملين نص تاريخنا فعليا دول ولاد ميت عقبة , انما لما غيرنا يشتري بركات والنحاس وفتحي اللي محققوش حاجة في تاريخهم قبل كدة ويحولهم لأساطير يبقي بيبني تاريخه بلاعيبة الأسماعيلي .. غلطة الحكم لصالحنا في الأسبوع الأول مش مؤثرة عشان لسة في أول الموسم, وفي الأسبوع الأخير ملهاش لازمة عشان المسابقة اتحسمت, أنما أي غلطة لمصلحة أي منافس بتبقي مؤثرة في أي وقت وتحت أي ظرف, حتي لو كانت ضربة جزاء في بطولة خلصناها واحنا ورا المنافس ب 36 نقطة ..

أحنا مية مية والله .. مية مية

https://www.facebook.com/A7mdMaher/posts/10214805923278102