زمان كان ابهاتنا تحكيلنا عن سعر اللحمة اللي كان بقروش وحرب اكتوبر وحفلات الست واول قصة حب وشكرا، ممكن يزود يقولك حرب الخليج مثلا او انتفاضة العيش ايام السادات او المواصلة اللي كانت بقرش ومليم.
لكن احنا هنحكيلهم ايه؟ هنبدأ من ايه؟ لو انا قاعد مع ابني وحب يسمع اللي عيشته هقوله كل ده ازاي؟
احكيله عن زلزال ١٩٩٢ ولا ارهاب التسعينات ولا السجاير اللي كانت ب٣ جنية وبقت ب٤٥ ولا الدولار ولا احداث سبتمبر ٢٠٠١ ولا بوش ولا اوباما ولا انتفاضتين الاقصى ولا ضرب بغداد ولا الربيع العربي ولا مبارك ولا مرسي ولا السيسي!! احكيله اني عشت سوريا وهيا دولة سياحية ولا عشت يناير ولا عشت الكورونا؟ احكيله عن اثيوبيا ولا احكيله عن الموبايل اللي بدأ معانا بالسوني اريكسون ابو ايريال لحد الآي فون؟ عن كاونتر سترايك ولا عن بابجي؟ عن سوبر ماريو ولا الwinning eleven ولا عن الfifa 2020؟
احكيله عن السايبر ولا الفيديو جيم ولا البلاي ستيشن؟ قناة مزيكا مثلا؟ اقوله عن كاس العالم اللي دخلناه ولا افريقيا اللي اخدناها ٣ مرات متتالية والمرة الرابعة خرجنا من التصفيات اصلا؟ عن حفلات التليفزيون اللي كانت بجنيهات ولا حفلات الساحل اللي بألوفات؟ احكيله عن سعر الشقق اللي كان ب٦٠ الف وبقت بملايين؟ احكيله عن انتقال السلطة اللي كان سهل في السعودية وكل اخ بييجي شوية؟ ولا عن حرب ولاد العم على كرسي المملكة؟ اقوله الكعبة فضيت في زمانا؟ ولا مش هيكون عارفها؟ طب احكيله عن ظهور مايكل جاكسون؟ طب تحول لون مايكل جاكسون؟ طب وفاة مايكل جاكسون؟ عن هاري بوتر؟ عن ال3D؟ عن السبكي وصافينار ولا صعيدي في الجامعة الامريكية؟ عن التقلبات في حياة محمد صبحي؟ ولا عن حسن شاكوش ولا عن شعبان عبد الرحيم؟ احكيله عن حفلة اضواء المدينة ولا اغنية واخترناه ولا قوم نادي عالصعيدي؟
احكيله احداث بورسعيد ولا احداث الدفاع الجوي؟ اقوله عن الميدان ولا التفجيرات ولا مشروع القرن ولا الجولان؟ اقوله تيران وصنافير مصرية ولا سعودية؟ عن الصين اللي قتلت الاويجور ولا اللي بندعيلها تخف من الوباء؟ احكيله ايه؟ الروهينجا وبورما ولا اليمن اللي في يوم من الايام كان اليمن السعيد؟ طب اقوله حضرت صدام حسين والعلوج؟ القذافي طيب؟ ولا الالعاب النارية اللي ضربت في سماء القاهرة سنة ٢٠٠٠م؟ ولا حفلة الهرم الرابع بتاعت تنظيم كاس العالم؟ ولا عن العبارة ولا قطر الصعيد ولا حريق محطة مصر ولا اتوبيس الاطفال؟ عن البابا شنودة ولا البابا تواضروس؟ عن الشعراوي ولا عن ميزو ولا عن عبد الله رشدي ولا محمد حسان والحويني ولا عمرو خالد؟ ولا الشيخ الغزالي ولا طنطاوي ولا عطية صقر ولا برنامج رؤى ولا مبروك عطية؟ خلف الاسوار والست اللي قطعت جوزها؟ ولا الواد اللي اغتصب اولاد الشوارع؟ ولا السلعوة والدبدوب اللي كان بيحمر بطاطس وصورة البنت اللي اتسخطت لما رمت المصحف علي الارض؟
احكيله عن جنون البقر؟ عن انفلونزا الطيور؟ سارس؟ انفلونزا الخنازير؟ الحصبة اللي انتشرت واحنا كبار؟ عن game of thrones؟ عن avengers؟ عن the joker؟ عن تيتانيك وافاتار؟ عن احمد زكي ولا محمد رمضان؟ عن مقتل ذكرى ولا سوزان تميم ولا بنت ليلى غفران؟ عن ابو تريكة ولا تركي آل الشيخ ولا ميدو ولا محمد زيدان ولا محمد صلاح؟ عن كوريا الشمالية ولا ايران؟ عن مسجد نيوزلندا ولا كنيسة القديسين؟ عن مجدي يعقوب ولا عبد العاطي كفتة ولا باسم يوسف؟ عن احمد فهمي لما كان مع شيكو وهشام ماجد ولا لما سابهم؟ عن الهضبة مع شيرين رضا ولا مع دينا الشربيني؟ عن الفار السندق اللي كان مع حلمي ولا اللي بقا مع علي غزلان؟
احكيلهم عن نجيب محفوظ ولا عن احمد خالد توفيق ولا عن احمد مراد؟ عن معرض مدينة نصر ولا التجمع؟ عن حفلة ياني ولا عرض الwwe ولا حفلة بيونسيه ولا شاكيرا؟ ولا عن مشروع ليلى؟ عن قطر؟ عن اردوغان لما جه جامعة القاهرة ولا لما بقا عدو الحكومة؟ عن ولاد المغازية ولا ولاد رزق ولا ولاد الحج متولي ولا ولاد عبد الغفور البرعي؟ عن يوسف شاهين ولا خالد يوسف قبل ولا بعد؟ عن الطفلة زينة ولا عن سعيد صالح ولا عن فيفي عبده ولا تصريحات شيرين؟ ولا احمد سعد وسمية الخشاب؟ ولا فوازير شيريهان وفطوطة؟ ولا لما يحيى الفخراني طلع لقيط في للعدالة وجوة كثيرة؟ ولا لما ماما نونا ماتت؟ ولا عن سببس تون؟ ولا عن عالم سمسم وماما سوزان مبارك؟ ولا مهرجان القراءة للجميع ولا اصحابي وصحباتي هنا ومحلك سر؟ ولا حفلة اغنية عبد القادر لخالد وفضيل ورشيد طه؟
احكيله عن ايه ولا ايه وكل اللي فوق ده ميجيش ١٪ من اللي عشناه، الحقيقة اننا عشنا اغرب ٣٠ سنة في التاريخ تقريبا، مفيش فترة قصيرة كدة جت علي مصر كانت مليانة احداث بالشكل ده، او مكنش كل الناس بتعيش الاحداث يوم بيوم زي ما بنعيش دلوقتي، عشان احكي لابني المستقبلي انا عشت ايه محتاج عمر فوق عمري احكي فيه التفاصيل، وكل تفصيلة بحكاية ويوم وموقف وقصة، ربنا يكون في عونك يا ابني اللي جي من اللي هتسمعه.