فكرة النسبية وربط الناس لاي حاجة “بالنتيجة النهائية” هو بالنسبالي اهم مفاهيم الحياة.
فمثلا لو انت بتذاكر اكثر من تخصص او بتلعب اكثر من رياضة مع بعض:
– فلو نجحت فيهم “بمعاير الناس” تبقي multitasker وبتستغل قدراتك وامكانياتك صح
– ولو فشلت في واحد علي الاقل تبقي كنت مشتت وضيعت وقتك “ومكنش” المفروض تعمل اكثر من حاجة في نفس الوقت
– ولو عملتهم مع بعض بس مكنش حد عارف انك بتعمل اكثر من حاجة هاتبقي (قصاد بعض الناس) اجتهدت وعملت اللي عليك والنتيجة بتاعت ربنا، و هاتبقي (قصاد البعض “الاخر” من الناس) كنت مقصر وكان لازم تعمل مجهود اكبر من كده.
انت في كل الحالات “عملت نفس الحاجة” وفي الاغلب “بنفس الطريقة”، الفرق الوحيد كان في “النتيجة” اللي فيها مليون عنصر/عامل/ظرف خارجي بيتحكموا فيه وانت ملكش اي تحكم فيهم.
ولو وضحنا مفهوم “بعض الناس” والبعض الاخر” هتلاقيه هو كمان نسبي جدا، يعني ممكن يبقي اخوك/صاحبك متفهم للموقف والتفاصيل اللي مريت بيها والضغوط اللي كانت عليك وقتها،
في حين ان والدك/والدتك “اللي شايفين برضه الظروف والضغوط ” ممكن “يظهر ليك” انهم مش متفهمين موقفك كويس ويعاتبوك/يهاجموك. وممكن العكس.
هل “البعض الاخر” مش فاهمين موقفك؟
في الاغلب فاهمين،
ولكن مهم انك تفرق بين هل الشخص اللي قدامي فاهم ولا لا؟
وهل قادر يتحكم في تصرفاته ولا لا؟
لان في اغلب الحالات، الشخص الفاهم مش بيقدر يتحكم في انفعالاته، وبالتالي ممكن يزعق/يشتم/يضرب او حتي يخاصم/يبعد ودا بيبقي نتيجة “للظروف” اللي هو بيمر بيها،
فرد فعله الناتج عن ظروفه الشخصية بيأثر عليك بالسلب، وبالتالي بتندم/بتتأثر باللي انت عملته، وبتكلمة الـ domino effect فانت بتسيب/بتبعد/بتوقف اللي كنت بتعمله رغم انه كان هو “الصح” ولكن كان محتاج شوية وقت.
فالمهم في الموضوع:
وعيك بأن اي حكم/نصيحة/ رأي هو مجرد “نتيجة” مبنية علي المعطيات اللي بتقولها للشخص اللي قدامك، وبالتالي الفيدباك اللي هاتخده واللي ممكن يخليك توقف/تبطل حاجات كتير كان نفسك فيها… فالاوبشن الوحيد بالنسبالك علشان ماتسمعش كلام يسم بدنك ويأثر عليك ويخليك توقف اي حاجة هو مدي قدرتك واجتهادك في توصيل المعطيات لبعض الناس، و تظبيط/توجيه المعطيات للـ “بعض الاخر”،
مع مراعاة الاحتفاظ بعدد قليل جدا عارف التفاصيل كاملة “ودا في الاغلب بيبقي شخص او اتنين بالكتير” بغض النظر عن مدي قرابتك/علاقتك بيهم
وفي حالة انك في وضع في اشخاص “متحكمين” او عندهم القدرة علي معرفة “كل التفاصيل” في الوقت الحالي”، فتأكد ان دا وضع مؤقت هايتنهي بعد فترة من الوقت بدون تغيرك لاي شيء..الفكرة بس انها محتاجة شوية صبر.