كل واحد مننا عنده إنجازات و نجاحات كثيرة يفخر بيها، لكن دايماً المشكلة في المقارنة، إحنا دايماً بنقارن كل تجاربنا بتجارب الآخرين، اللي هو مش هينفع اقارن نجاحي في عمل صينية بطاطس خرافية مع واحدة عاملة بيكاتا بالمشروم، ولا ينفع اقارن نجاحي في الكاريير مع واحد عنده بيزنس خاص،غباء فطري علشان نقلل من نفسنا وننكد عليها ليس إلا، حتي في الفشل أو الإخفاق بنقارن، تلاقي حد خسر إستثمار في تجارة يقولوله قول الحمد لله اللي هناك ده خسر ملايين في عقارات 😂 فيحس انه في وضع أفضل فيشعر بالرضا عن الخسارة .
النجاح والانجاز نوعين : واحد انت اللي بتحسه و تقيمة وفقاً لتجربتك الشخصية، والتاني الناس هي اللي بتقيمة وفقاً لرؤيتها في الحياة، إحنا بقي بنستبدل الأول بالتاني علشان نحس بقيمة أكبر علشان قدرنا ننتصر علي مجموعة من الناس، بس صدقني أعظم إنجازات كانت بينك وبين نفسك والناس مش طرف فيها …. قيم تجاربك صح .