ايوه الابوة والامومة مش رتبة يستتبعها استحقاقات بمجرد ما خدت نيشان انك خلفت لا
الموروث اللي بيدعم السلطة الابوية على حساب قهر الضعيف كله غلط
ابذل مجهود عشان تستحق حب
ومع عيالك اقل مجهود حيروي والله واقل بذرة حتزرعها حتفرع
“قلبي على ولدي انفطر وقلب ولدي علي حجر” كذب بواح وابتزاز ونصب
انت لك حياة كاملة دراسة وشغل ولحظات سعادة وتعاسة وقصص حب وكره قبل ما تخلف ولادك لكن هم ما يعرفوش الدنيا قبلك
انت نقطة البداية بالنسبة لهم
اعمل معاهم اي حاجة.. انت بتتعامل مع اكتر انسان على الكوكب بيتلكك عشان يحبك ويعذرك ويسامحك ويقدر ظروفك ويحسن الظن بيك
انت بتتعامل مع انسان مصدق انك لما ضربته بالحزام عشان بيشرب سجاير عملت كده عشان بتحبه فهو مش بس مسامحك ده ممتن لك انك اذيته الاذية دي وما اعتذرتش
مفيش حد حينفعك غيره لا ست ولا راجل ولا صاحب ولا شغل
وكفاية نصب ع العيال وايهامهم انك بتؤذيهم عشان بتحبهم
احنا مش روبوت ولا ملايكة وبنغلط وبنفش غلنا في العيال
قول انا اسف
انت ما تستاهلش مني كده وكوني مضغوط فغلطت في حقك ده تفسير لكن مش تبرير انا اسف حقك عليا
حيفتكرها لك ولما تموت حيقول ماما او بابا كانوا بيعتذروا لي وعشان كده طلعت صوتي حلو وباغني! اي حاجة والله بيتلككوا على اي حاجة عشان ينسبوا لك فضل اي جهد هم بذلوه ونجحوا فيه بدل ما يقول ده تعبي يقول دي امي ده ابويا
واه يا جماعة فيه اهل بيتخلوا عن عيالهم ومش عارفة ليه عندهم استحقاق كده انه حتى لو تخليت عنك انت عبدي؟ والمجتمع بكل قسوة يدعم ده وينسبه لربنا!
وفيه موضوع منتشر جدا ان تلاقي اب ما بيسالش ويقول ما اصل هي امهم اللي مقسياهم
طب الفنان محمد رشدي رحمة الله عليه لما ام ابنه الكبير منعته يشوفه بقى كل يوم يقعد ع القهوة يشوف ابنه وهو نازل ويعيط
هي وحشة وعايز تعاند معاها؟ اقولك؟ فسي لها عجل العربية .. او اكسر لها علبة بودرة الاساس
بس عيالك تتشقلب وتشوفهم
ولو ما عرفتش ابنك او بنتك عرف انك بتتشقلب ومش عارف وحس انه غالي عندك
وحيعيش العمر فاكرهالك ولما تموت حيترحم عليك
كلمة الله يرحمك من القلب تقدر تاخدها من عيالك باقل مجهود
عشان جيس وات
قالوا لك بكرا تخلف وتعرف ان محدش حيحبك قد ابوك وامك ولما خلفت اكتشفت ان محدش حيحبك قد عيالك وان عندك كتير في حياتك غيرهم وهم مالهمش غيرك
والقليل اللي حتديه لهم في ضعفهم حيدوك قده عشر مرات وانت في ضعفك
وعمرهم ما حيضربوك بالحزام عشان خايفين عليك