المعلومة ايه قبل ازاي

لما كنت فى الكلية وكنا بندرس C كان الناس بتستغرب ليه احنا ندرس C ونكتب command line programs مع ان فيه كليات تانية بتدرس XNA وبيطلعوا جيمز، ليه ندرس لغة “قديمة” كده ونعاني علشان تطلع GUI application مع ان ممكن تستخدم C# والدنيا هتكون اسهل.
بعد ما اتخرجت و كملت كويب ديفلوبر، لاقيت الديفلوبرز بيبصوا على حاجة زي memcache او redis على انها اختراع، كانها تكنولوجي جديدة، ودلوقتي نفس الحاجة مع hadoop او docker.
حاليا ده بيحصل بالظبط مع الcryptocurrencies، لو قريت البيبر اللى بتوصف الفكرة هتلاقي الموضوع بسيط، هتقول لنفسك “اه فكرة حلوة، شكلها كويس و اللوجيك مظبوط” مش هتقول انها “تكنولوجي ثورية” او انها اختراع هيغير البشرية، فكرة علمية صحيحة وتاثيرها مش معروف لحد ماتنفذها و الناس تستخدمها.
لاحظت ان الباترن فى كل المواقف دي ان الناس مش فاهمة اللى فى ايديهم من الاساس، الناس بتشوف الابليكيشن بياخد input كذا و بيطلع output كذا وهو مايعرفش ايه اللى بيحصل جواه علشان يوصل للنتيجة دي، مع ان الموضوع ممكن يكون بالبساطة انه مجرد data structure مكتوب كويس بلغة سريعة زي C او Go ودي كل الحكاية، مافيش اي اختراعات او “تكنولوجي” فى الموضوع، لكن لان المستخدم، سواء ديفلوبر بيستخدم docker او مستخدم عادي معاه wallet فيها bitcoins ، مش فاهمين اللى فى ايديهم ده بيشتغل ازاي، ده بيولد بذرة hype بيتضخم فيها الابليكيشن من مجرد برنامج مكتوب كويس ل”تكنولوجي جديدة” ل”تكنولوجيا ثورية هتغير الlandscape” وبيساعد فى كده محررين مواقع التكنولوجي اللى مش فاهمين هم بيتكلموا عن ايه وبيأثروا وبيتأثروا ببعض.
ده بيحول حاجة زي docker من مجرد ابليكيشن او set of tools مكتوبة كويس وبتستخدم الsystem features ل”تكنولوجي” الديفلوبرز بيعايروا بعض انهم لسة مش عارفين يستخدموها.
لو كنت من البداية اتعرفت على حاجة زي الC فى الكلية او الcgroups فى لينوكس او الpeer2peer networking ماكنتش هتتفاجئ قوي لما حد يكلمك على حاجة زي lucene او docker او bitcoin.
علشان كده نصيحتي للناس اللى لسة فى كلية او اتخرجوا ولسة بيتفاجئوا بالlibraries او بأبليكيشنز زي docker او ansible او ايا كان، انهم يفهموا الاساسيات، اساسيات لغات البرمجة زي C و Assembly ويعرفوا ازاي الmicroprocessor شغال، يعرفوا نظام التشغيل عامل ازاي خصوصا Linux، يعرفوا الداتا ستركتشرز والالجوريزمز المهمة، لو فيه ابليكيشن حد بيكلمهم عليه و شكله منبهر قوي، دور انت الابليكيشن ده مكتوب ازاي، مين اللى عامله، بيعمل الفيتشرز دي اعتمادا على اي فيتشرز فى السيستيم، ده اللى هيزود مهاراتك فعلا مش انك تستخدم الابليكيشن وخلاص، فى الاخر لو هتستخدم الابليكيشنز من غير ماتعرف هي معمولة ازاي هتفضل طول عمرك مستخدم للبرامج اللى الديفلوبرز التانيين بيعملوها، وبدل ما المسافة بينك و بين الديفلوبرز اللى احسن منك بتقل، المسافة بينك و بين المستخدمين العاديين هي اللى هتكون بتقل.

https://www.facebook.com/emad.elsaid.hamed/posts/10155245549542957