التصنيفات
مقالات الضيوف

#الكتالوج_العصري_للراجل_المصري

الراجل المصري..

# انسان مقضي حياته بخمس تي شيرتات و بنطلون جينز و كوتشي و 3 شرابات.. و بقاله كده 30 سنة..
فا ما تستنيش منه يلف معاكي علي محلات..
هو لو يطول يقولك ملعون أبو الشوبينج علي المولات كان قالها، بس هو خايف عليكي من أثر الصدمة..
هو بالنسباله كمية اللبس اللي عندك و الشنط و الجزم ده سفه.. ممكن يتاجر بيهم و تئبوا علي وش الدنيا بقي..
و مش هيصعب عليه انك معندكيش باليرينا فيها نفس درجة الشنطة.. هيبصلك بمنتهي الاحتقار.. ما تعصبيهوش..و هاتي الباليرينا من وراه…

# انسان بسيط جداا…
كل درجات الالوان تتلخص في ابيض و اسود و ازرق و احمر..
مالوش بقي في قاموس الالوان اللي انتي نازلاله بيه ده..
أكرملك ما تسأليهوش تفتكر البينك أحلي و اللا البربل و اللا الكافية أولية..
هو غالبا هيقولك كلهم حلوين و لو ربنا كرمه و اختار لون فا وغلاوتك هو قال اسهل لون عرف ينطقه مش اكتر و لا أقل.. و لما تلبسيه في البيت هيقولك مين اللي اختارلك اللون العجيب ده.. اسألي مها علي الالوان عشان تفيدك..

# انسان متصالح مع نفسه..مش بيركز مع ستاتس صحابه و لا بياخد الكلام علي نفسه..و لا ليهم في جو الخرزة الزرقا و الحسد و العين..لو العربية اتدشدشت ما يقولش اصل محمود ركب معايا و حسدني..و لا هيفضح محمود و اللي جابه و يجرسه علي الفيس بوك..زي ناس نعرفهم كويس..

# ما تسأليهوش اسئلة محرجة زي تحب تيجي معايا عند ماما و اللا تنزل تخرج مع صحابك…؟؟
بيني و بينك السؤال ده ما يتسألش..اجابته لا يختلف عليها راجلين علي وجه الكوكب ده..
و مش هفسر أكتر من كده..
يارب تكوني فهمتي..

# لو قالك مبيحبش السوشي او التشاينيز او الهندي او اي حاجة..ما تحاوليش..و مش هيحبها لو كلها من ايدك برضه..هتترمي…خليكي في الخضار باللحمة..سهل و لذيذ..

# لو بتعمليله تاج و مش بيعبرك…اوعي تحرجي نفسك تاني..
بطلي جو ال 5000 مينشن.. مش هيرد.. طلعيه من دماغك و اعملي تاج لدينا صاحبتك هترد في ثانيتها..

# لو بيجبلك هدية في الفلانتين..فا هو مش مقتنع..
لو بيجيبلك هدية في عيد جوازكوا، فا هو مش مقتنع..
لو بيديكي عيدية فا هو مش مقتنع…
بس بيريحك و بيرحم نفسه من بوز يقدر ب 7 متر و صلاحيته لمدة 3 سنين قابلة للتجديد..

# مفيش راجل بيفهم التحوير بتاعنا..
اللي هو انتا مش بتخرجني خالص..و انت مش بتحبني..
هيقولك ما انا خرجتك يوم الخميس 2 يوليو سنة 2015 الساعة 8 بالليل و روحنا سينما و كلتي من كنتاكي دينر بوكس و جبتلك كولسلو..
فا خليكي دوغري..

# لو قولتي لجوزك مالك و قالك و لا حاجة..
سيبيه براحته..
هو مش زينا بيعوز حد يتحايل عليه بدل المرة الف..هو بجد مش عايز يتكلم..

# الرجالة ملهمش في جو التصوير كل دقيقتين بتاعنا ده..هو لو اتصور بيبيقي من غلبه..و عشان تنزلي من علي ودنه..مش عشان حب التصوير فجأة..

# بلاش سيلفي مع راجل..مش هتعجبك النتيجة..مش هيعمل بوز البطة و لو عمله هيبقي بوز الديناصور..بلاش احسن..

# مفيش راجل بيموت في الزيارات العائلية زي ما انتي فاكره..دي مجاملات..

# مفيش راجل بيحب المفاجآت..الرجالة مش بتحب الورد..الرجالة مش بتحب جو العيد ميلادات و لا اي احتفالات.. الكب كيك بيعصبه..

# الراجل مالوش في جو السربرايز بارتي و لا انك تجيبيله تورته و يهف في الشمعة..و مفيش راجل بيحب يجيب دباديب و لا يتجابله دباديب..

# الراجل ممكن ما يركزش لو حاجة مش نضيفة…بس كله كوم و العربية كوم..اعتبري نفسك قاعدة في حضانة اطفال رضع و لو قدرتي تلبسي كيس بلاستيك فوق الجزمة البسي..هيحبك أووووي.. اوعي تاكلي او تشربي فيها…برضه هيحبك اوووووي…

# مفيش راجل بيحب الرغي..مش هييجي يقولك كلت ايه و شربت ايه و عملت كذا في الخروجة..دي حركاتنا احنا..
بالنسبة للرجالة الحمد لله ده اجمل رد لكل حاجة..كلهم كده..
مش هيفرق مع راجل ان منة حامل او ان ميار سابت شغلها..او ضربت مديريتها و جابتها من شعرها…كل ده بالنسباله هزي..

# اكبر جميلة تعمليها لراجل سيبيه نايم علي السرير و اديله الريموت و اشتركيله في ال beIN Sports او OSN.. صدقيني دي بالنسباله كأنه وداكي المالديفز في فندق 7 ستارز…all inclusive..

# الراجل و هو مهاجر ممكن يحط هدومه كلها و جزمه في كيس بلاستيك من بتوع كارفور..انتي اللي بتاخدي الوزن كله.. ما تحوريش…
فا لو طالعين الساحل ممكن يكون حاطط لبسه في جيب البنطلون…انتي اللي ممرمطاه في الشنط و الشيل و الحط..

# ايووون…خروجة صحابه اجدع عنده من الخروج مع صحباتك المتجوزين و اجوازهم مليار مرة…تعايشي و بطلي زن..

# الرجالة مالهومش في التواريخ..فاكر اول يوم اتقابلنا كان كام ميلادي؟ و اول يوم اتخانقنا كان كام هجري؟ و كنت لابس ايه لما قابلت بابا اول مره..
الديتيلز دي بتصيبه بالإعياء و ممكن يفشكل الجوازة كلها..هو مش في امتحان ثانوية عامة..

# الراجل مش بياخد باله انك صبغتي شعرك الا لو كان شعرك اسود و بقي اورانج او فوشيا..لكن لو صبغتي بني بندقي و لا هيعبرك من هنا لقرن جاي..انتي نفسك مش ملاحظة الفرق يا بايخة…اعترفي..

# الراجل عنده اللي يصحيه من النوم من المحرمات..و لو فكرتي تصحيه يبقي لسبب قهري..بتولدي مثلا..غير كده استني..كلها 16 ساعة و يصحي من القيلولة بتاعته..الدنيا ما طارتش..

# جو.. أصل مامتك و مامتي و خالتك و خالتي و اختك و اختي..
اخرته حاجة من الاتنين.. يا هيسيبلك البيت و يطفش.. يا انتي هتعيطي لحد ما جفونك تبألل و تباتي عند مامتك يا فالحة
.. فا بلاش منه..

# ما تغلطيش في صحابه و لا في قعدة القهوة..الحاجات دي ريد لاين…توقفي عندها و ستوووب يا أمووورة..

# أكل مامته أحلي من أكلك و من أكل 10 زيك..دي من الثوابت الكونية زي الشمس بتشرق من المشرق كده.. ما تتعبيش نفسك و تحرقي سعرات علي الفاضي…

# تبقي لامؤاخذه في الكلمة عبيطة لو قارنتي نفسك ببلاي استيشن او اكس بوكس او بولة استيميشن او بماتش الكلاسيكو..
او حاطيتي نفسك في مقارنة مع الاهلي او ابو تريكة…
يعني ما ينفعش تقوليله أنا أهم و اللا ميسي؟؟
و اللا ما تطنش ماتش برشلونة و تعالي نروح لمروة..
و اللا ماتش الاهلي أهم و اللا اننا نخرج سوا!؟؟
لازم تبقي متأكدة من الاجابة..
ميسي طبعاً..
و برشلونة مين اللي يتطنشلها…و مين مروة اساساً !؟
و معروفة ان الاهلي فوق الجميع..
انتي عبيطة يا بنتي ..

الرجالة ابسط مما تتخيلوا يا جماعة..
احنا اللي تفاصيلنا كتير بزيادة…
عرفتوا بقي يعني ايه الرجالة من المريخ..
كوكب دمااااااااااغ..
ملحوظه لزم التنويه عنها…مش شرط كل الصفات دي تتجمع في كل راجل.. في راجل فيه صفتين بس او تلاتة….
مش بقول ان كل الرجالة كده..
بس لو اتجمعت كل الصفات دي في جوزك يبقي ده حظك بقي يا بنت المحظوظة..

#الكتالوج_العصري_للراجل_المصري

تم نشر المقال في جريدة البوابة نيوز عدد يوم الأحد الموافق 26 يوليو 2015

#سارة_الذهبي

https://www.facebook.com/permalink.php?story_fbid=1467336836918215&id=100009257380189