وانا صغير كنت بسمع جدتي وهي بتقول “العناد يولد الكُفر”
وساعتها طبعا كان عقلي ، وخبرتي الحياتية ميؤهلونيش لفهم معنى جملة زي دي
كبرت … وقابلت في الحياة حاجات كتير كنت عايز أوصلها … منها اللي عرفت أوصله ، ومنها اللي معرفتش
لكن بصراحة أنا مكنتش شخص سهل يسيب حاجه هو عايزها ،
وعلشان كده في حاجات فضلت أجري وراها لحد ما نفسي أتقطع ،
وخسرت أثناء مطاردتي للحاجات دي حاجات وناس أهم من الحاجات اللي أنا بطاردها نفسها …
وكإن من المستحيل عليا إني أعترف بكل بساطة إن “بطه مش ليك يا مرزوق … بطه مبتحبكش”
وفي الآخر لقيت نفسي قاعد جنب أطلال كل اللي أنا هديته علشان أوصل للحاجات اللي كنت عايز أوصلها -وموصلتلهاش بالمناسبة- وبقول “ليه كده يارب” ، وكإن ربنا هو السبب …
ففهمت ساعتها ليه “العناد يولد الكُفر
#فقة_الرضا