فكرة ( موقع علي بابا المصري ) هي فكرة فاشلة
وللأسف جات لي تعليقات كتير جدا بتسأل عن الأسباب
خلينا نشوف
هل حضرتك بتفكر تعمل موقع زي علي بابا في مصر ؟!
لأ
طيب ليه بتسأل عن أسباب فشل هذه الفكرة
دا علم لا ينفع
أنا موجه البوست للناس اللي بتراودها هذه الفكرة
فلو حضرتك مش بتفكر في الفكرة دي
فمن الحكمة إنك تتجاوز الموضوع ده للي بعده
وما تشغلش بالك بالبحث فيه
أما لو حضرتك مهتم بالموضوع
فأنا قلت في البوست إن تقريبا ما فيش دولة غير الصين قادرة تعمل موقع زي علي بابا
فدي مشاكل لا تقدر على حلها الدول
فحضرتك بتسأل عن المشاكل دي ليه
هتحلها ؟!
لأ
طيب بتسأل عنها ليه وانا وانتا عارفين انك مش هتقدر تحلها
إحنا مثلا عاوزين نثبت سعر صرف الدولار أمام الجنيه
عشان لو حد من برا داخل يشوف سعر منتج النهارده
ما يجيش بكره يلاقيه مختلف
حضرتك هتثبت سعر الدولار
لأ
يبقى شاغل بالك بمشاكل الدولة ليه ؟!
حضرتك هتحلها ؟!
لأ
طيب تقدر تساعد في حلها ؟!
لأ بردو
يبقى شاغل بالك بيها ليه ؟؟
دا علم لا ينفع
لعلم الذي لا ينفع . يضر
أولا . بياخد مساحة من تفكيرك . وبيشغلك عن نقطة تركيزك.
ثانيا . بيضيع وقتك . وانتا محاسب على هذا الوقت في أي شيء أفنيته
ثالثا
هيفتح عليك أبواب عجز . بينما المطلوب هو إنك توجه مجهودك في حاجة تقدر تنجز فيها
إنجاز ورا إنجاز يبقى انتا بتستفيد . والناس بتستفيد . ونفسيتك بتتحسن
لكن لما تلبس نفسك في حاجة أكبر من طاقتك . وتعجز . فما حدش استفاد حاجة . غير إنك هتتعب نفسيا !!
رابعا . التفكير في حل المشاكل الكبرى . هو مصيدة شيطانية
حضرتك فاشل في مهمة صغيرة أنتا تقدر تنجزها
فالشيطان بدل ما يسيبك تجتهد لحد ما تقدر تحلها . ومش قادر يقول لك سيبها
فيعمل إيه ؟
يقوم مشجعك . ومحمسك . وملبسك في مشكلة كبيرة جدا على مستوى الأمة كلها . ويقول لك انتا اللي هتحلها يا منعم
والنتيجة ؟!
تهانينا . لا حليت الموضوع الصغير . ولا الكبير . والشيطان قاعد هايص
خامسا
حضرتك مع الوقت هتتحول لطالب أبدي . يتعلم ولا يعمل
زي اللي بيأكل ولا يتمرن . فيتحول الأكل لدهون . وليس لعضلات
الطالب الأبدي هوا اللي بيخلص دراسة مشكلة . فيقوم لابس في مشكلة أكبر . يدرسها بردو
لكنه عمليا ما بينزلش ينفذ أي حاجة على الأرض
وده سببه انشغاله بالعلم الذي لا ينفع
المطلوب هو التوازن بين العلم والعمل
حضرتك اتعلمت شيء . انزل نفذه واشتغل فيه
لما تجيب آخره . فكر تتعلم حاجة جديدة . وتكون هتقدر تعمل فيها إنجاز
لو حاجة بعيدة عن إيدك . عن استطاعتك . ومش هتفيد الناس فيها بحاجة . يبقى سيبها في حالها . وانشغل بحالك
انتا غير محاسب على مشاكل العالم . انتا محاسب على المساحة الصغيرة اللي ربنا سبحانه وتعالى كلفك بيها
أحسن فيها . وما تضيعهاش وتنشغل بمساحات أخرى عظيمة جدا . ومهمة جدا . لكنها مش مساحتك أصلا . ولا تقدر تبني فيها . ولا تقدر حتى توصل لها