التصنيفات
المدونة

الخلط بين مفهوم الشيء القبيح و الغريب

او الشيء الوحش والشيء الجديد

في بعض الاحيان في خلط بيحصل بين مفهوم الشيء الوحش (بمعني القبيح) والشيء الجديد (بمعني الغريب)

فانت ممكن تسمع مثلا “اغنية” برتم وايقاع سواء متعود عليه او لا..وتحبها عادي.

زي ما بيحصل مع ناس كتير في سماع اغاني اجنبية (سواء انجليزية او اسبانية) وهما مش فاهمين اي حاجة من الكلمات، او بيبقوا لاقطين كلمتين او ثلاثة بالكتير، ومع ذلك بيحبوها عادي. سواء بيبحها لانه حابب اللحن، او لانها كانت جزء من مسلسل/فيلم عجبه واتشد ليه، او لانها كانت مرتبطة بموقف/شخص هو حابه، او لاي سبب تاني.

وممكن تسمع “اغنية” بكلمات “مكتوبة بلغتك اللي بتفهمها” وتحس انها غريبة/مش مفهومة، فتقول عليها “اغنية وحشة”.

كل ده عادي وتمام، وكلنا “بشكل او بأخر” بنعمل كده طول الوقت.

المشكلة من وجهة نظري بتحصل لما تعمم وجهة نظرك (كشخص او مجموعة معينة مرتبط ببعض او كـ “جيل” معين) وتبقي هي المرجع ليك وبناء عليها تحكم ان اي حاجة “انت/مجموعتك/جيلك” مش فاهمينها/حابينها بانها وحشة، وازاي “المختلفين” عنك مش بيفهموا و زوقهم وحش والخ الخ الخ.

الموقف ده غير انك بتتكلم عن حاجة “نسبية” مش شايفها مناسبة ليك، فانت كمان “بكلامك” بتحول الموضوع من انها حاجة “فيها احتمالية اراء مختلفة” لمشكلة شخصية في الناس اللي بيعملوا كده.

ودا بيخلي الناس “المختلفين” معاك يحسوا انهم في موقف دفاعي..فيتمسكوا بارائهم و وجهة نظرهم اكثر..حتي لو شافوا في كلامك جزء من المنطق.

لانك بدل ما تقول انهم ناس عادية بتسمع حاجات mix فيها جزء من اللي انت بتسمعه وجزء تاني “انت مش حابه”، فانت شخصنت المشكلة عليهم.

هل كده مفيش صح ولا غلط؟

اكيد طبعا فيه… بس الاصل ان الحاجات دي حاجات من حيث “المبدأ/المرجع” وبتتغير تفاصيلها بالمواققف/الزمن.

ودا اللي المفروض تعلمه/توصله للشخص اللي بتحاول تكلمه.

فهمه ازاي يحكم علي المواقف… ازاي يقيمها ويعرف يقيس بنفسه.

لان في الاغلب اكيد انت عديت بمواقف كان فيها مثلا ممثل كبير كل افلامه فيها تحرش، او مغني كل افلامه اللي عملها فيها ايحاءات بشكل او بأخر، وانت عديت دا عادي “وقتها”، وكنت “وفي بعض الاحيان” لازلت معجب بيهم…فالمشكلة هي انك متحتكرش الحكم في الصح والغلط لنفسك، لان دي الحاجة الوحيدة الغبية “الغلط” المتكررة.

عايز توصل مفهموم، علم الناس او علي الاقل المهمين منهم بالنسبالك، ازاي ييفهموا و يقيموا ويحكموا علي الحاجات، ميبقاش الموضوع مجرد فرض “سلطة” بسبب قدرتك/قوتك او لانك تقدر تعمل كده، لان الدنيا بتلف ومش هاتقدر تعمل ده علي طول.

خاصة في زمن اي حاجة بتتطور فيه “خاصة” الكلمات والافكار، والتطور دا بيتنقل بسرعة من اي مكان لاي مكان بشكل اسرع من اي وقت قبل كده.

لو عايز مثال تعرف تفرق بيه، فممكن تقيس ايه من الحاجات الجديدة عليك، بتحبها؟

لو لقيت ان كله الجديد بالنسبالك وحش…فانت “بختك” وحش انك عايش في زمن بييتطور اسرع منك.