ليه الناس بتشوف محتوى بضان
ناس كتير عندهم وقت فراغ كبير، وواحد بيقدم محتوى بيوصلهم، فالناس دول بيشوفوا الكلام على ايه
والناس دول بقى نوعين
نوع ذوقه خرة، بيعجبه المحتوى ده بجد، فبيفضل يشوفه، وينشره
والنوع التاني بيشوف إن المحتوى ده يقرف، فمنهم اللي بيبطل يشوفه، ومنهم اللي بيفضل يشوفه من باب أدينا بنتفرج، ومنهم النوع الأخطر على الإطلاق، وهما الناس اللي بيفضلوا يشوفوا المحتوى ده كمادة للسخرية
ودول بقى اللي بينقلوا المحتوى ده نقلة تانية
لحد المرحلة دي بيكون المحتوى وصل لآلاف من الناس، أو بالكتير مئات الآلاف، وده مش رقم كبير
لكن بمجرد المحتوى ده ما يتحول لمادة للسخرية نطاق الإنتشار بيبقى مرعب
والشريحة المفصلية اللي بتشوف المحتوى ده عشان تسف عليه نوعين
النوع الأول: عديمي الموهبة اللي يادوب بيسفوا ع المحتوى ده في كومنت طمعا في شوية لايكات، وإحساس بالتفوق
ودول بيساهموا في انتشار المحتوى بشكل بسيط بين أصدقائهم اللي المحتوى ده بيبدأ يظهر عندهم بسبب الكومنت اللي اتساب عليه
النوع التاني: ده بقى الأخطر
احنا هنا بنتكلم عن ناس عندها موهبة حقيقية في السخرية .. ناس بيعملوا كوميكس ع المحتوى ده تضحك بجد
ودول بقى اللي بينقلوا المحتوى ده نقلة ضخمة، بسبب إن الكوميكس دي بتنتشر إنتشار أوسع من إنتشار المحتوى نفسه
فاكرين الناس اللي لقوا إن المحتوى ده يقرف فبطلوا يشوفوه، واللي فضلوا يشوفوه من باب أدينا بنتفرج؟
أهم دول عمرهم ما كانوا بيعملوا، ولا هيعملوا شير للمحتوى ده .. لكن لما بيشوفوا الكوميكس اللي عليه بيضحكوا بجد، لإنهم فاهمين الكلام ماشي ازاي .. وده بيخليهم ينشروا الكوميكس دي، وهنا تبدأ مرحلة جديدة تماما
مرحلة:-مش فاهم ياسطى الكوميك اللي انت مشيرة
=بص ياسطى .. الكوميك ده على ده
وهنا بتحصل مشاهدة زيادة … بتجيب ضحكة زيادة … وشير للكوميك زيادة … وواحد مش فاهم زيادة … فسؤال زيادة … فإجابة تجيب مشاهدة زيادة …وهكذا
كام أغنية انت شوفت كوميكس عنها قبل ما تسمعها؟
كام يوتيوبر عرفته من الكوميكس اللي بتتعمل عليه؟
وهنا بقى التويستاية
انا مليش دعوة باللي بيقدم المحتوى الخرة ده، كل إنسان حر
انا عايزك انت
انت ياللي عمال تقول الدنيا ماشية بضهرها، بص مين بياخد كام على ايه، يا خسارة الشهادات والمجهود والفلوس …الخ
انت عبيط يابني؟
هو انت مش ضحكت؟
عايز تضحك ببلاش؟!
صفحة الكوميكس، واللي بيعمل الكوميك اتشهروا، وعملوا فلوس
اللي بيقدم المحتوى اللي كان مادة للسخرية إتشهر، وعمل فلوس
وانت ضحكت
زعلان ليه؟!
اللي بيقدموا المحتوى ده وافقوا على صفقة انهم يبقوا مادة للسخرية، واستحملوا ضغط نفسي رهيب مقابل الفلوس اللي بيعملوها
انت اللي زعلان من الصفقة اللي عملتها
انت الشرير يا صاحبي
انت اللي عايز تضحك ببلاش
انت اللي عمال تعبي جواك غيرة، وغل، وحقد، وعدم رضا عن وضع انت السبب فيه
وكل ده بيخليك مستني للناس دول غلطة ..
زي انهم يعملوا مقلب في بنتهم، فتهجم عليهم، وتدمرهم عشان تفضي شوية م اللي جواك
وبعدين تروح تضحك على غيرهم، ويتشهروا، وتحس انهم ميستحقوش اللي هما فيه، وتستنالهم غلطة .. وهكذا
الحياة صفقات يا صاحبي … الصفقة اللي مش مريحاك متعملهاش