– كان فيه فندق قديم، وكان الزباين دايما بيتشكوا من بطء الأسانسير اللي فيه، وإنهم بيستنوا كتير قوي عبال ما بييجي. أصحاب الفندق حسبوا تكلفة تغيير الأسانسير فلقوها مرتفعة جدا، فقرروا يعلموا حاجة غريبة قوي: جابوا مراية وحطوها جنب باب الأسانسير من بره، فبقى اللي بيستنى الأسانسير بيبص على نفسه في المراية، واختفت الشكوى!
[مش فاكر قريت القصة دي فين الحقية، بس غالبا في مكان له علاقة بالسوفتوير!]
– في أحد الأنظمة اللي اشتغلنا عليها كان المستخدمين كتير بيتشكوا إن سلوك النظام في حتة معينة مختلف عن توقعهم، يعني هما كانوا متوقعين النظام يعمل س لكن لقوه بيعمل ص. وكان ده بياخد مننا وقت كتير مع كل شكوى لغاية لما نكتشف إن النظام شغال صح بس هما اللي مش فاهمين إيه اللي حصل بالضبط. الحل اللي غالبا بيفكر فيه المبرمجين بيكون كالتالي: إيه رأيكم لو عملنا tool تنينية مجنحة تساعدنا إننا نعمل playback للbusiness rules أو الconditions اللي قررها النظام، فلما تجيلنا الشكوى هوب دبل كيك نشغل الtool العظيمة بتاعتنا، فنرد على المستخدم على طول وما نضيعش وقت في فحص المشكلة (troubleshooting)؟!
بس الحقيقة الفريق عمل حل تاني بسيط جدا: في الحتة اللي المستخدمين بيشتكوا منها بقوا يطلعوا لهم رسالة واضحة تقول لهم إن النظام عمل ص مش س عشان كذا وكذا، والشكاوى اختفت!
الحل هنا كان شوية UX مش برمجة.
– كان المستخدمين بيدخلوا للنظام بحسابات خاصة (user name and password) لكن تمت إضافة خاصية الدخول بحساب على الactive directory بجانب الحساب القديم، و المستخدم يقدر يدخل بأي واحد فيهم، في الأول كانت كل طريقة للدخول محطوطة في Tab، لكن جت شكاوى كتير جدا إنهم بيدخلوا بياناتهم الصحيحة لكن النظام مش بيدخلهم، ببساطة كانوا بيدخلوا حسابهم على الactive directory في مكان الcustom user name and password و العكس. اللي عملناه إننا شيلنا الtabs وعرضنا الاتنين جنب بعض وهو شايفهم هما الاننين وبقى يدخل الحساب اللي هو عاوزه، واختفت الشكوى!
الحل هنا برضو كان شوية UX مش برمجة!
مين يقول لي أمثلة تاني على حل مشكلة من غير برمجة؟ أو يقول لي قواعد ممكن تساعد المبرمجين يقرروا هايستثمروا مجودهم في إيه؟