الحلول النقديّة تصنع مشاكل اقتصاديّة

الحلول النقديّة زيّ إيه ؟!
1 – زيّ طباعة الفلوس
2 – زيّ رفع سعر الفائدة في البنوك
عشان الناس تحطّ فلوسها في البنوك – فالحكومة تلاقي سيولة لتشغيل مشاريعها
والناس ما يبقاش معاها فلوس – فيقلّلوا الشراء – فالأسعار تنزل
3 – زيّ الاقتراض من الخارج
4 – زيّ رفع الفائدة على الودائع الدولاريّة لاستجلاب المال الساخن

دي حلول نقديّة
اللي حطّ الحلول دي هو واحد بيفهم في الفلوس من حيث كونها فلوس
من حيث كونها ورق
من حيث كونها رقم

فحضرتك عندك مشكلة في إيه
رقم الفلوس في الدولة قليّل ؟! سهلة – نطبع فلوس
حجم الودائع في البنوك قليلة ؟! سهلة – نرفع الفايدة – فنجيب فلوس كتير تدخل البنوك لتسيير حركة المشاريع الحكوميّة
عندك مشكلة في إيه ؟ في الدولارات – سهلة – نقترض دولارات
مش هنعرف نطبعها – لكن ممكن نقترضها
اقترضنا من الحكومات الأجنبيّة وعاوزين نقترض من الأفراد الأجانب ؟!
سهلة – نرفع الفائدة على الودائع الدولاريّة – فالأفراد الأجانب ييجوا يحطّوا دولاراتهم هنا

دي حلول نقديّة

يعني واحد بيبصّ للفلوس باعتبارها ورق – باعتبارها رقم

حاجة كده زيّ ما يكون طفل درجة حرارته مرتفعة – فالدكتور يعمل إيه ؟!!!
يحطّه في التلّاجة !!!
ويقول لك آدينا خفّضنا درجة حرارته اهو – اعترض بقى أو قول إنّي فشلت في مهمّتي

أيوه إنتا فشلت في مهمّتك والطفل حالته بتسوء
لا أبدا – أنا نجحت في مهمّتي
تعالى نحسبها بالطريقة العلميّة – هات ترمومتر – وقيس درجة حرارة الطفل – هتلاقيها بتنخفض بعد ما حطّيناه في التلّاجة
وبينما إنتوا بتتخانقوا – الطفل مات !!!

دي الحلول النقديّة
الحلول النقديّة رغم إنّها من حيث وجهة نظر الأرقام بتحلّ المشكلة – إلّا إنّها بتصنع مشاكل اقتصاديّة
حضرتك عدد الفلوس في البلد قليّل – الحلّ النقديّ إيه – اطبع فلوس
هتلاقي فعلا عدد الفلوس في البلد زاد
لكن !!!
هتلاقي الأسعار زادت – فالحلّ النقديّ بتاعك عمل مشكلة اقتصاديّة

حضرتك عاوز فلوس للحكومة تدفع بيها مرتّبات وتدفع بيها مستحقّات المقاولين
بسيطة – ارفع الفايدة في البنوك – فالناس تجري تحطّ فلوسها في البنوك
اتفضّلي يا حكومة ورق ادفعي بيه مرتّباتك ومستحقّاتك

تكتشف بعد كده إنّ الناس اللي حطّت فلوسها في البنوك دي – كانت مصفّية مشاريعها – وحوّلتها لسيولة – وحطّتها في البنك – لإنّ الفايدة في البنك أفضل لها من وجع القلب بتاع المشروع
فتكتشف إنّ المشاريع اللي اتصفّت دي طردت عمّال
فحضرتك صنعت مشكلة اقتصاديّة – مشكلة بطالة !!!
مع إنّك حلّيت المشكلة النقديّة – وهي عدم توافر سيولة عند الحكومة

في المقابل الناس اللي هتروح تاخد قرض من البنك – هترفع هامش ربحها في بيع منتجاتها – عشان تقدر تسدّ القرض بفوايده
فلمّا ترفع هامش ربحها – الأسعار تزيد – يعني تضخّم
فحضرتك بتعمل إيه ؟!!!

ضرتك عدد الدولارات عندك قليّل ؟! بسيطة – نستلف دولارات
هتلاقي الاحتياطيّ زاد من 30 مليار ل 40 مليار
برافو يا دكتور
درجة حرارة الطفل نزلت فعلا

تكتشف بعد كده إنّك محتاج تسدّ القروض دي بفوايدها !!!
فتلاقي نفسك رايح لصندوق النقد – فتلاقيه بيقول لك الغي الدعم – قلّل الموظّفين
فتلاقي نفسك لابس في مشاكل اقتصاديّة
فإنتا حلّيت مشكلة نقديّة – وصنعت مشكلة اقتصاديّة !!!

عاوز دولارات زيادة ؟!!!
ارفع الفايدة على الودائع الدولاريّة – فيجيلك الخواجات بالشنط السامسونايت – يحطّوا دولاراتهم عندك
فالاحتياطيّ يزيد من 40 مليار دولار ل 50 مليار دولار
برافو يا دوكتووووور

تيجي أمريكا ترفع الفايدة ربع في ال 100
تلاقي الخواجات بيسحبوا الدولارات من عندك – ويحطّوها في بنوك أمريكا
فالاحتياطيّ هوبّ دابل كيك ينزل بشكل كبير
فتلاقي نفسك مش قادر توفّر دولارات لاستيراد مستلزمات الإنتاج
فالمصانع تحصل لها مشكلة في استيراد مستلزمات الإنتاج !!!

فإنتا حلّيت مشكلة نقديّة ( عدد الدولارات )
وصنعت مشكلة اقتصاديّة ( تعطيل المصانع )

حضرتك بتعمل إيه ؟!!!

المشاكل الاقتصاديّة عاوزة حلول اقتصاديّة – مش نقديّة
لو جبت واحد بانكير – بتاع بنوك – هيعطيك حلول – وهتنفّذ معاك في الأرقام فعلا
ع الآلة الحاسبة هتلاقي حلوله ليها نتائج
لكن ما كانش دا الاختيار الصحيح – ولا كان ده الشخص المناسب
الشخص المناسب كان لازم يكون شخص ( اقتصاديّ ) مش ( نقديّ )

الموضوع يشبه إنّك عاوز تبني فيلّا – فتروح تجيب مهندس مدنيّ يبنيها لك – مش مهندس معماريّ
مهندس المدنيّ مش هيقول لك لأ – وهيعمل لك فيلا فعلا
بسّ هتكتشف بعد كده إنّك عايش في علب كبريت جنب بعضها

هتكتشف إنّ الشمس مش بتشرق على غرفة النوم – فتتحرم من نعمة ربّنا سبحانه وتعالى دي
هتكتشف إنّ الشمس بتغرب على الصالة – فتلاقي الصالة بالليل نار
أو محتاج تجيب تكييفات كتير – فتخسر فلوس !!!
هتكتشف إنّ أوّل حاجة بتقابل الهواء في الفيلّا هي المطبخ والحمّام
فالهوا ياخد روايحهم يدخّلها الفيلّا !!!
وإنّ البوتوجاز كان عند باب المطبخ – فلمّا انفجر والمدام جوّا المطبخ – ما عرفتش تهرب – وماتت محروقة !!!
هتكتشف إنّ ما فيش بلكونات !!!
أصل المهندس المدني شايفها بدعة من بدع الطبقة الأوليجارشيّة المخمليّة الملعونة
وإحنا بروريتاريا حضرتك ما نحبّش البلكونات والكلام الفارغ ده
إن ما كانش البرج يطلع صبّ زيّ ليمان طره كده يا إمّا ما أطلعبوهش
ما حدّش فتّح عين الشعب ع البلكونات والمياصة وقلّة الخشا دي غير العيال النايتي بتوع عمارة

دا الفرق بين مهندس المدنيّ ومهندس العمارة
هوّا أنا كنت عاوز أبني فيلّا وخلاص ؟!
ولّا كنت عاوز مكان أعيش فيه وأستمتع فيه – وأكون آمن فيه
دا اللي بتكتشفه لمّا تجيب مهندس مدنيّ يعمل شغل مهندس عمارة
ودا اللي بتكتشفه لمّا تجيب واحد بانكير يحلّ مشكلة اقتصاديّة !!!

الشخص النقديّ هو واحد حافظ مش فاهم
ال 100 جنيه بالنسبة للبانكير هي ورقة ب 100
ممكن يشيلها من جيبه اليمين ويحطّها في جيبه الشمال – ويعتبر إنّه كده عمل حركة ماليّة – وتنشيط للاقتصاد في بنطلونه !!!
وممكن يفكّها بورقتين ب 50 – ويعتبر إنّه كده زوّد الفلوس !!!
ومش هيقول لك إنّها ممكن تتفكّ 20 ورقة بخمسة
أصل أيّ حدّ خبير بيبقى سايب حاجات كده ما بيقولهاش لعامّة الشعب
دي حاجات لو عرفتوها تبقوا عمد
لأ دا إنتا تيجي تمسك محافظ البنك المركزيّ بقى

الشخص البانكير ممكن يكون عنده ساعة تسوى 150 جنيه – فيبيعها ب 100 جنيه – مش مشكلة
اصبر بسّ – إنتا مش فاهم دماغه
هيبيعها ب 100 جنيه – ويحطّ ال 100 جنيه دي على ال 100 جنيه داكهيّاتي – ويقول لك أنا كان معايا 100 جنيه – بقوا 200 – مش برافو عليّا ؟! – ولّا مش برافو عليّا
وممكن يستلف ورقة ب 100 تالتة ويقول لك جلا جلا – فرّج ع الحلاوة حلاوا – ال 100 جنيه خلّيتهم 300 – أودّي مهاراتي دي فين بسّ – دا نا خسارة فيكوا – بسّ قاعد معاكوا فشقة بيكم مش أكتر

دا الشخص النقديّ

لكن الشخص الاقتصاديّ مش كده
الشخص الاقتصاديّ لمّا تقول له عاوزين فلوس عشان نعطي مرتّبات لموظّفين الحكومة – هيقول لك – ( وليه الناس أساسا تفكّر تكون موظّفين حكومة ؟! – ليه معظم الناس ما بتفكّرش تشتغل بنفسها – وتعمل مشاريعها الخاصّة ؟! )
ويشتغل على كده
بعد 10 سنين – تلاقي الحكومة بدل ما كانت محتاجة 100 مليار مرتّبات – بقت محتاجة 50 مليار بسّ
لإنّ المشاريع الخاصّة بقت بتكسّب الناس أحسن من وظائف الحكومة – فالموظّفين قلّوا – فما بقيناش محتاجين أساسا نضغط نفسنا في طباعة فلوس للحكومة عشان تدفع مرتّبات
فتجيب الشخص النقديّ اللي كان فوق يرصّ الشيشة للشخص الاقتصاديّ

الشخص الاقتصاديّ لمّا تقول له عاوزين فلوس نعطيها للمقاولين – هيقول لك ( وليه نعطي المقاولين فلوس ؟!!! )
ما تيجوا يا مقاولين تدخلوا معايا بنسبة في أرباح المشاريع دي !!
ويحسبها للمقاولين بالورقة والقلم – يطلع المقاول من مصلحته إنّه يسيب جزء من أجره في المشروع ده – مقابل حصّة منّه
فيبقى أنا بنيت لكوا المباني اللي إنتوا عاوزينها – وما دفعتش حاجة !!!

تخيّل تبقى راكب العربيّة مع خالك الحاجّ سعيد المقاول – ومعدّيين على كارتة طريق
فتلاقيه بيدفع 10 جنيه قيمة الكارتة – وبيضحك !!!
بتضحك ليه يا جاجّ سعيد – فيقول لك أصل فيه جنيه من ال 10 جنيه دول هيرجع لي تاني آخر السنة
أصل أنا عقبال أملتك ليّا 10 % من إيرادات الطريق ده لمدّة 10 سنين !!!
المفروض تسعد إنتا كمان – لإنّك قاعد جنب الحاجّ سعيد

الشخص الاقتصاديّ هيقلّل الفايدة في البنك – فاللي ليه فلوس في البنك يلاقيها بتخسر – فيسحبها ويعمل بيها مشروع – يشغّل فيه ناس
فالناس دي تحلّ من على دماغ الحكومة كموظّفين أو مستحقّين للدعم
والتنابلة اللي كانوا راكبين فوق دماغ الحكومة من الناحية التانية وعاوزين فوايد الفلوس آخر السنة – هينزلوا من على دماغها بردو – لإنّهم سحبوا فلوسهم من البنوك أصلا
فصاحب المشروع بقى بيرزق ومش عاوز فوايد البنك – والموظّف بقى بيرزق ومش عاوز منّي دعم

أنا كشخص اقتصاديّ هنا عملت إيه ؟!
خلّيت ده عمل مشروع – شغّل فيه ده – ولبّست دا ف ده – كإنّي ما عملتش حاجة

الشخص الاقتصاديّ لمّا تقول له عاوز دولارات – مش هيروح يجيب ناس تحطّ ودائع دولاريّة في البنوك – ولكن هيجيب ولاده المغتربين يقول لهم أنا خصّصت ليكم أراضي بالدولار – فولاده يبعتوا الدولارات من برّا ويشتروا بيها أرض هنا
فيبقى دخّل الدولارات للاحتياطيّ – ومش ملزم بأيّ حاجة !!!

ولو شخص أجنبيّ عاوز ييجي بدولاراته – ييجي – أهلن وسهلن – بسّ ما يحطّهاش في بنك
ييجي يحطّها في مصنع أو مزرعة
فيشغّل لي ناس

وأقول له إنتا بقى بالذات يا واد يا خواجة إنتا – إنتا تدفع المرتّبات بالدولار في رصيد الموظّفين في البنك
الموظّف يروح يسحب مرتّبه من المكنة آخر الشهر – يلاقي طالعاله جنيهات
بينما الدولارات اللي حطّها الخواجة – ذهبت في دهليز سرّيّ إلى البنك المركزيّ

الدولارات دي دي مش وديعة هياخدها الخواجة وهوّا ماشي – دي أجور صرفناها للعمّال خلاص
اتحسبت لك طلعة
ولمّا امريكا ترفع الفايدة – الخواجة يلاقي نفسه مش عارف يسحب فلوسه من البنك – لإنّها أساسا مش في البنك !!!
دي بقت مصنع أو مزرعة – بيع المصنع بقى وشوف هتبيعه إزّاي
فأبقى أنا في أمان من الخروج المفاجيء والسريع للمال الساخن – اللي ممكن يسبّب لي صدمة في الاحتياطيّ

الشخص النقديّ يشوف الكلام ده – يقول لك إيه دا – الرقم ما زادش في البنك !!!
فلان دخل بمليار دولار – أنا ما شفتوش في البنك – دا فشل !!!

فعلا المليار دولار دا ما سمّعش عندك في البنك – لإنّه اتحطّ في استثمار حقيقيّ
لكن المليار دولار اللي إنتا ما شفتوش ده – شغّل كام واحد وراه – وحلّ مشكلتهم الاقتصاديّة
ومش كده وبسّ – دا وفّر عليك إنتا كشخص بانكير تدبير فوايد المليار دولار دول بالدولار
وشال عنّك خوف المطالبة بيهم في أيّ وقت – لمّا دولة تانية تعرض سعر فايدة أعلى
وشال عنّك كابوس نقص الاحتياطيّ

الشخص الاقتصاديّ لمّا تقول له ( مش لاقيين دولار نستورد بيه مستلزمات إنتاج ؟!!! )
هيقول لك ( وليه نستورد مستلزمات إنتاج أصلا ؟!!! – ما نصنّعها إحنا ؟!!! )
اللي له إيد وراس – يعمل اللي يعملوه الناس
ناقصنا إيه يعني عشان نصنّعها – شوف ناقصنا إيه ونعمله
فتلاقي نفسك بعد كده ما فيش عندك مشكلة نقديّة أساسا في توفير سيولة دولاريّة للاستيراد

فالشخص الاقتصاديّ بطريقته الاقتصاديّة – حلّ مشكلة الشخص النقديّ
يعني البانكير قاعد في البنك – يلاقي الضغط بيقلّ عليه في طلب لدولار من المستوردين
لإنّ الشخص الاقصاديّ حوّل له المستوردين لمصنّعين

وأرجع تاني وأقول لك
الحلول النقديّة تصنع مشاكل اقتصاديّة
والمشاكل النقديّة – لا تحلّها إلّا الحلول الاقتصاديّة

المصدر