هل التريند والريتش والاستعراض والأفورة كمدخل للسيطرة عى النقاش مش موجودين الا عندنا بس .. الأجابة هى لا .. الكلام ده موجود فى الدنيا كلها بعد ما وسائط التواصل ونماذجها بقت متشابهة .
لكن ايه اللى مش موجود عندنا ؟
اللى مش موجود عندنا هو عضم ومتن وجسم الثقافة والمعرفة .. اللى بيقدر يفرمل اشياء .. ويحسم جدالات بدرى بدرى .. اللى مش موجود عندنا هو الجدل المنتظم المستمر بين الكتل الثقافية الرئيسية .. بين افكارها و طروحاتها .. واللى التريند والريتش بييجوا عشان يشتبكوا معاها وحواليها .. مش براها ومش فى مواجهتها .
اللى حاصل بقاله كام سنة .. هو تدمير الثقافة ووسائطها باللغة العربية .. بطريقة حربية وصفرية .. اجتثاث بروح استئصال الشأفة .. ومن هنا .. وهنا فقط .. ظهر عبد العاطى كفتة ولم يواجهه أحد .. يحاصرنا الكوركومين الكوركومين شكرا لأبو النصر الأمين بلا مغيث يغيثنا .. ومن هنا تم نطق المصرية القديمة فجأة بل والغناء بها .. ومن هنا تم علاج الكوفيد وبالكورامين والشلولو على القناة الأولى فى التلفزيون .. ومن هنا اشياء كثيرة مهينة لا تتوقف حتى وصل بعض مواطنينا للشرب من ماء المجارى كبركة بينما رأس الدولة يتحدث عن خزائن ربى التى لا تنضب .
هناك مشكلات يمكن حلها فى سنة أو اثنين .. الطعام .. الشراب .. موازين الثروات .. اما الحضارة .. فيقينا لا أعلم كم من الوقت نحتاج لاستردادها .
بعض المتذاكين من مرضى الدهشة كانوا يتسائلون .. كيف انهارت الحضارة المصرية القديمة .. أقولك حضرتك .. اقل من ربع فى المئة فقط من السكان هم من كانوا يحملون العلم والمعرفة والكتابة وقتها .. ويبدو أن هؤلاء قد ماتوا أو أبيدوا فى عقد ما من الزمن لاسباب لا نستطيع الأمساك بها .. تحدث هذه الأشياء .. وتحدث هى بأسهل مما تتخيل .